‌Blade mafia: ബ്ലേഡ് മാഫിയ സംഘത്തിന്റെ മർദ്ദനം; കെഎസ്ആർടിസി കണ്ടക്ടർ ചികിത്സയിലിരിക്കെ മരിച്ചു

KSRTC Conductor: പാലക്കാട് കുഴൽമന്ദം നടുത്തറ വീട്ടിൽ കെ.മനോജ് (39) ആണ് ആക്രമണത്തിൽ പരിക്കേറ്റ് ചികിത്സയിലിരിക്കെ മരിച്ചത്.

പാലക്കാട്: ബ്ലേഡ് മാഫിയക്കാരുടെ ആക്രമണത്തെ തുടർന്ന് പരിക്കേറ്റ് ചികിത്സയിലായിരുന്ന കെ.എസ്.ആർ.ടി.സി കണ്ടക്ടർ മരിച്ചു. പാലക്കാട് കുഴൽമന്ദം നടുത്തറ വീട്ടിൽ കെ.മനോജ് (39) ആണ് തൃശൂരിലെ സ്വകാര്യ മെഡിക്കൽ കോളേജിൽ ചികിത്സയിലിരിക്കെ മരിച്ചത്. കഴിഞ്ഞ ഒമ്പത് ദിവസങ്ങളായി ചികിത്സയിൽ കഴിയുകയായിരുന്നു മനോജ്.

ഈമാസം ഒൻപതിന് കുളവൻമുക്കിലെ സാമ്പത്തിക ഇടപാടുകാർ മനോജിന് നൽകിയ പണം തിരിച്ച് കിട്ടാൻ വൈകുന്നതിനെച്ചൊല്ലി  ആക്രമിച്ചുവെന്നാണ് ബന്ധുക്കൾ പോലീസ് നൽകിയ മൊഴി. ആക്രമണമുണ്ടായ ദിവസം വൈകിട്ട് മനോജ് അവശനിലയിൽ സഹോദരി താമസിക്കുന്ന കൊടുവായൂരിലെ വാടക വീട്ടിലേക്ക് എത്തുകയായിരുന്നു.

ആരോഗ്യ സ്ഥിതി മോശമായതിന് പിന്നാലെയാണ് മനോജിനെ തൃശൂരിലെ സ്വകാര്യ മെഡിക്കൽ കോളേജിൽ പ്രവേശിപ്പിച്ചത്. മരണ കാരണമായേക്കാവുന്ന നിരവധി പരിക്കുകൾ മനോജിൻ്റെ ശരീരത്തിലുണ്ടായിരുന്നുവെന്ന് പരിചരിച്ച ഡോക്ടർമാരും പോലീസിനെ അറിയിച്ചിട്ടുണ്ട്. ബന്ധുക്കളുടെ പരാതിയിൽ പുതുനഗരം, കുഴൽമന്ദം സ്റ്റേഷനിലെ ഉദ്യോഗസ്ഥർ അക്രമികളെക്കുറിച്ചും ആക്രമണത്തിനുള്ള കാരണം സംബന്ധിച്ചും അന്വേഷണം ആരംഭിച്ചു.