മലയാളികളുടെ ഇംഗ്ലീഷ് ഉച്ചാരണത്തെ പുച്ഛിച്ചു മല്ലൂസ് എന്നൊരു വിളിയുണ്ടായിരുന്നു....

ബിബിസിയിൽ തത്സമയം അതിഥിയായെത്തിയ കേരളാ ആരോഗ്യമന്ത്രി കെകെ ശൈലജ ടീച്ചറിനെ അഭിനന്ദിച്ച്  ചലച്ചിത്ര സംവിധായകന്‍ ജൂഡ് ആന്റണി ജോസഫ്. 

തന്‍റെ ഔദ്യോഗിക ഫേസ്ബുക്ക്‌ പേജില്‍ പങ്കുവച്ച കുറിപ്പിലൂടെയാണ് ജൂഡ് മന്ത്രിയെ അഭിനന്ദിച്ച് രംഗത്തെത്തിയിരിക്കുന്നത്. 

ശൈലജ ടീച്ചര്‍ അഭിമാനമാണെന്നാണ് ജൂഡ് പോസ്റ്റില്‍ പറയുന്നത്. ഭാഷയുടെ ഉച്ചാരണത്തിലല്ല പ്രവര്‍ത്തിയിലാണ് കാര്യമെന്നും ജൂഡ് പറയുന്നു.

'മലയാളികളുടെ ഇംഗ്ലീഷ് പ്രൊനൗസിയേഷനെ പുച്ഛിച്ചു മല്ലൂസ് എന്നൊരു വിളിയുണ്ടായിരുന്നു . മലയാളം മീഡിയം വിദ്യാർത്ഥിയായിരുന്ന ഞാൻ അത്തരം കളിയാക്കലുകൾ കുറെ കേട്ടിട്ടുണ്ട് .ഇപ്പോൾ ഷൈലജ ടീച്ചറുടെ ബിബിസി ഇന്റർവ്യൂ കണ്ടു. ഭാഷയുടെ ഉച്ചാരണത്തിലല്ല കാര്യം , പ്രവർത്തിയിലാണ് .
# ഷൈലജടീച്ചർഅഭിമാനം' -ജൂഡ് കുറിച്ചു. 

കോറോണ പ്രതിരോധത്തിനായി കേരളം സ്വീകരിച്ച നടപടികൾ വിശദീകരിക്കാനായാണ്‌ മന്ത്രി ബിബിസിയിൽ അതിഥിയായി എത്തിയത്. 

ഇന്നലെ രാത്രി ഒൻപതു മണിയ്ക്ക് ബിബിസി വേൾഡ് ന്യൂസിലായിരുന്നു മന്ത്രിയുടെ അഞ്ചുമിനിറ്റ് നേരത്തെ അഭിമുഖം ലൈവായി സംപ്രേഷണം  ചെയ്തത്.

നേരത്തെ പ്രമുഖ ബ്രിട്ടീഷ് മാധ്യമമായ 'ദി ഗാർഡിയൻ' ആരോഗ്യമന്ത്രി ശൈലജ ടീച്ചറിനെ 'Rockstar' എന്ന് വിശേഷിപ്പിച്ചിരുന്നു. പ്രമുഖ ജേണലിസ്റ്റും എഴുത്തുകാരിയുമായ ലോറ സ്പിന്‍ തയ്യാറാക്കിയ ലേഖനത്തിലായിരുന്നു 'Rockstar' എന്ന വിശേഷണം.