Cyclone Mocha Latest Updates: 'मोचा'चे तीव्र चक्रीवादळात रुपांतर, काही राज्यात जोरदार पावसाची शक्यता

India Weather Forecast : अंदमान समुद्रात सुरु झालेल्या मोचा चक्रीवादळाचे तीव्र चक्रीवादळात रुपांतर झाले आहे. हे वादळ सध्या कॉक्स बाजारच्या दक्षिण-नैऋत्येस सुमारे 700 किमी अंतरावर आहे. गेल्या 6 तासात हे चक्रीवादळ 10 किमी प्रतितास वेगाने ईशान्येकडे हळूहळू सरकत आहे. हे वादळ आज दुपारच्या सुमारास कॉक्स बाजार (बांग्लादेश) आणि क्यवप्यूमधील (म्यानमार)  किनारपट्टी ओलांडण्याची शक्यता आहे. दरम्यान, हे वादळ अतिशय वेगाने किनारपट्टीवर धडकेल, असा इशारा हवामान विभागाने दिला आहे.

 'मोचा' वादळ अतिशय वेगाने किनारपट्टीवर धडकेल

वाऱ्याच्या हालचालींचा वेग वाढला आहे. त्यामुळे, वादळ (Cyclone Mocha) जमिनीवर येण्यापूर्वी किंचित कमजोर होऊ शकते. असे असले तरी, हे वादळ 160 किमी प्रतितास आणि 180 किमी प्रतितास वेगाने वाऱ्यासह किनारपट्टीवर धडकण्याची शक्यता आहे. किनारपट्टी ओलांडल्यानंतर वादळाचा जोर कमी होईल. त्याच्या प्रभावाखाली आज पश्चिम बंगाल, ओडिशा, बांग्लादेश आणि म्यानमारच्या किनारी भागात मुसळधार ते अतिवृष्टी अपेक्षित आहे. 

दरम्यान, देशाच्या उर्वरित भागात अंदमान आणि निकोबार बेटांवर आज शनिवारी   हलका ते मध्यम पाऊस झाला.यासोबतच काही ठिकाणी मुसळधार पावसाची नोंद झाली. दक्षिण केरळ, मणिपूर, लक्षद्वीप, किनारी केरळ, अंतर्गत कर्नाटक आणि दक्षिण महाराष्ट्रातही हलका पाऊस झाला आहे. दुसरीकडे, दिल्ली-एनसीआरसह उत्तर भारतातील बहुतांश भागात हवामान कोरडे आणि उष्ण राहण्याची शक्यता आहे. पश्चिम राजस्थान आणि सौराष्ट्र आणि कच्छच्या काही भागातही उष्णतेची लाट आली.

या राज्यांमध्ये आज पाऊस पडू शकतो

ईशान्य भारतात आजपासून 16 मे पर्यंत हलका ते मध्यम पाऊस पडण्याची शक्यता आहे. त्रिपुरा आणि मिझोराममध्ये आज अनेक ठिकाणी गडगडाटासह वादळी पाऊस पडण्याची शक्यता आहे. 14 आणि 15 मे रोजी नागालँड, मणिपूर आणि दक्षिण आसाममध्ये काही ठिकाणी मुसळधार पाऊस पडू शकतो. पूर्व आसाम आणि अरुणाचल प्रदेशात 14 ते 16 मे दरम्यान मध्यम ते मुसळधार पाऊस पडू शकतो.

राजधानी दिल्लीत धुळीच्या वादळाची शक्यता

दिल्ली NCR  बद्दल बोलायचे तर, आज अनेक भागात वादळ आणि धुळीचे वादळ येण्याची शक्यता आहे. दिल्ली व्यतिरिक्त पंजाब, हरियाणा, उत्तर राजस्थान, दिल्ली आणि पश्चिम उत्तर प्रदेशच्या काही भागातही असेच हवामान राहील. पश्चिम हिमालयात हलका ते मध्यम पाऊस पडण्याची शक्यता आहे. उंच पर्वतीय भागात हलकी बर्फवृष्टी होऊ शकते. गुजरात, पश्चिम राजस्थान, पश्चिम मध्य प्रदेश आणि विदर्भाच्या काही भागात उष्णतेची लाट येऊ शकते. केरळ, दक्षिण कर्नाटक आणि लक्षद्वीपमध्ये एक किंवा दोन मध्यम पाऊस पडण्याची शक्यता आहे.