जिल्ह्यांनी ऑक्सिजन प्लांट्सची तात्काळ उभारणी करा, मुख्यमंत्र्यांचे निर्देश

मुंबई : कोविडच्या तिसऱ्या लाटेचा धोका लक्षात मुख्यमंत्री उद्धव ठाकरे यांनी सर्व जिल्हाधिकाऱ्यांना महत्वाचे निर्देश दिले आहेत. जिल्ह्यांनी कोणत्याही परिस्थितीत त्यांच्याकडील ऑक्सिजन प्रकल्प तात्काळ उभारावे आणि आवश्यक औषधांचा साठा ठेवण्याचे आवाहन मुख्यमंत्र्यांनी केले. निर्बंधाच्या काळात दुर्बल घटकांसाठीच्या जाहीर पॅकेजप्रमाणे या घटकांचा तात्काळ लाभ द्यावा. केवळ घोषणा नव्हे तर त्याची प्रत्यक्षात अंमलबजावणीचो निर्देश जिव्हाधिकाऱ्यांना देण्यात आलेयत. मुख्यमंत्र्यांनी कोविड परिस्थितीसंदर्भात विभागीय आयुक्त, जिल्हाधिकारी, पालिका आयुक्त यांच्याशी दूरदृश्य प्रणालीद्वारे संवाद साधला.

मुख्यमंत्री उद्धव ठाकरे म्हणाले, आपल्याला आता अतिशय सावध राहून पुढील तिसऱ्या लाटेचे नियोजन करावे लागेल. कडक निर्बंध लावल्यानंतर लगेचच रुग्णसंख्येत उतार पडेल असे नाही. तरी देखील वेळेत कडक निर्बंध लावल्याने अंदाजित मोठी रुग्ण वाढ आपण रोखू शकलो.

तिसऱ्या लाटेला रोखण्यासाठी लसीकरणाचा वेग महत्वाचा आहे पण त्यासाठी पुरेश्या प्रमाणात व वेळेवर लस पुरवठा अतिशय गरजेचा आहे. आपण आता 18 ते 44 वयोगटातील नागरिकांना मोफत लस देण्याची घोषणा केलीय. मात्र पुरवठ्यावर त्याचे नियोजन करावे लागेल तसेच जिल्ह्या जिल्ह्यांमध्ये याची अंमलबजावणी देखील व्यवस्थित पार पाडावी लागणार असल्याचे मुख्यमंत्री म्हणाले.

ऑक्सिजन प्लांट्स उभारण्यास आवश्यक त्या परवानग्या देण्यात आल्या आहेत. कोणत्याही परिस्थितीत येत्या काळात पुरेसा ऑक्सिजन रुग्णांसाठी उपलब्ध राहील याची दक्षता जिल्हा प्रशासनाने घ्यावी. यासाठी कोणतेही कारण चालणार नाही असे मुख्यमंत्र्यांनी यावेळी स्पष्ट केले.