बोंबाबोंब! रविवारी Mumbai Local च्या तिन्ही मार्गांवर मेगाब्लॉक; पाहा वेळापत्रकातील बदल
Mumbai Local News : रविवारच्या सुट्टीनिमित्त राहिलेल्या भेटीगाठी, खरेदी, फेरफटका या आणि अशा अनेक कारणांनी मुंबईकर घराबाहेर पडतात खरं. पण, रेल्वेनं प्रवास करणार असाल तर आधी ही बातमी वाचा...
 "बोंबाबोंब! रविवारी Mumbai Local च्या तिन्ही मार्गांवर मेगाब्लॉक; पाहा वेळापत्रकातील बदल")
Mumbai Local News : रविवार म्हटलं की अनेकांसाठीच हा सुट्टीचा दिवस. याच सुट्टीच्या दिवशी भटकंती, खरेदी किंवा भेटीगाठींच्या निमित्तानं घराबाहेर पडण्याचा बेत असेल आणि त्यातही रेल्वेनं प्रवास करण्याचा विचार करत असाल तर रविवारचं वेळापत्रक पाहूनच घराबाहेर पडा, नाहीतर पश्चातापाची वेळ येईल. कारण, सुट्टीच्या दिवशी एकिकडे वाहतूक कोंडीची समस्या डोकं वर काढताना दिसेल आणि दुसरीकडे मात्र रेल्वेच्या दिरंगाईमुळं प्रवासाचा खोळंबासुद्धा अटळ अशीच परिस्थिती पाहायला मिळेल.
कोणकोणत्या मार्गांवर मेगाब्लॉक?
रविवारी मध्य रेल्वेवर माटुंगा- मुलुंड अप आणि डाऊन जलद मार्गावर सकाळी 11.30 वाजल्यापासून दुपारी 3.30 पर्यंत चार तासांचा तसेच अप ब्लॉक असेल. तर, डाऊन हार्बर मार्गावर छत्रपती शिवाजी महाराज टर्मिनस (CSMT) ते चुनाभट्टी/वांद्रे या स्थानकांदरम्यान सकाळी 11.10 ते सायंकाळी 4.40 वाजेपर्यंत विविध काही तांत्रिक आणि देखभालीच्या कामांसाठी मेगाब्लॉक घेण्यात येणार आहे.
ब्लॉक कालावधीत पर्यायी वेळापत्रक...
मध्य रेल्वेमार्गावरील ब्लॉकदरम्यान CSMT वरून सकाळी 10.58 ते दुपारी 3.10 पर्यंत सुटणाऱ्या डाऊन जलद मार्गावरील रेल्वे माटुंगा स्थानकातून धीम्या मार्गावर वळवल्या जातील. तर, माटुंगा आणि मुलुंड स्थानकांदरम्यान मात्र या रेल्वे त्यांच्या नियोजित थांब्यांवर थांबतील.
ठाण्याहून सकाळी 11.25 ते दुपारी 3.27 या वेळेत सुटणाऱ्या अप जलद मार्गावरील गाड्या मुलुंड, माटुंगा स्थानकांदरम्यान अप धिम्या मार्गावर वळवण्यात येतील. दरम्यानच्या काळात रेल्वे साधारण 15 ते 20 मिनिटं उशिरानं धावतील.
हेसुद्धा वाचा : Maharashtra Weather News : भर हिवाळ्यात पावसाचं सावट; आज कोणत्या भागांमध्ये यलो अलर्ट?
पश्चिम रेल्वेवर शनिवारी रात्री ब्लॉक
पश्चिम रेल्वेवर सांताक्रूझ आणि गोरेगाव या स्थानकांदरम्यान पाचव्या आणि सहाव्या मार्गावर शनिवारी मध्य रात्री ब्लॉक घेण्यात येणार आहे. सिग्नल यंत्रणेच्या देखभाल दुरुस्तीसाठी हा ब्लॉक घेण्यात येणार असून शनिवारी मध्य रात्री 11.30 ते रविवारी पहाटे 3.30 दरम्यान हा चार तासांचा ब्लॉक घेतला जाईल.
तिथं हार्बर मार्गावर सकाळी 11.16 ते दुपारी 4.47 पर्यंत वाशी/ बेलापूर/ पनवेलसाठी सुटणाऱ्या सेवा आणि CSMT हून याच वेळेत वांद्रे / गोरेगावसाठी सुटणाऱ्या सेवा कायम राहतील. तर, पनवेल / बेलापूर / वाशीहून सकाळी 9.53 ते दुपारी 3.20 पर्यंत मुंबई सीएसएमटीसह गोरेगाव/वांद्रे इथून 10.45 ते सायंकाळी 5.13 पर्यंत सीएसएमटीच्या दिशेनं सुटणाऱ्या सेवा रद्द राहतील.
Sayali Patil
सायली पाटील या 'झी 24 तास डिजीटल'मध्ये सिनियर सब एडिटर पदावर कार्यरत असून, त्यांना पत्रकारिता क्षेत्रातील 11 वर्षांचा अनुभव आहे. त्यांनी 'लोकमत', 'लोकसत्ता' या वृत्तपत्रांसाठी काम केलं. 'लोकसत्ता'मधील 'VIVA' या जीवनशैली विषयावर आधारित पुरवणीसाठी त्यांनी लिखाण केलं पुढे त्यांनी लोकसत्ता डिजीटलसाठी काम केलं. त्यांनी 'एबीपी माझा' च्या डिजीटल टीमसोबत कामाचा अनुभव घेत 2021 मध्ये पुन्हा एकदा 'झी 24 तास डिजीटल'मध्ये रुजू होत विविध विषयांवरील बातम्यांमध्ये योगदान दिलं. मनोरंजन आणि Lifestyle विषयांतील सुरुवातीचा अनुभव आणि त्यानंतर राजकारण, आरोग्य, प्रवास, राज्यस्तरीय बातम्यांमध्येही त्यांचा हातखंड आहे. सिनेमांचं समीक्षण, राष्ट्रीय स्तरावरील वृत्त, जागतिक स्तरावरील घडामोडी, हवामान वृत्त आणि खगोलशास्त्राश, पुरातत्त्वं विभागाच्या संशोधनासंदर्भातील बातम्यांमध्ये त्यांना विशेष रुची आहे. भटकंती, सिनेमा, विज्ञान, खाद्यसंस्कृती हे त्यांच्या विशेष आवडीचे विषय आहेत.
...Read More