शिवसेनेचा दसरा मेळावा, मुंबईत पोलिसांचा चोख बंदोबस्त

मुंबई : दादरच्या शिवाजी पार्कवर शिवसेनाचा दसरा मेळावा आज होतोय. दसरा मेळाव्याला महाराष्ट्रभरातून शिवसैनिक येण्याची शक्यताय. त्या पार्श्वभूमीवर मुंबई पोलिसांनी चोख पोलीस बंदोबस्त ठेवलाय.

शिवाजी पार्कवर ३ एसीपी, एक डीसीपी, १४ पोलीस निरीक्षक, २८ पोलीस उप निरीक्षक आणि ३५० पोलीस कॉन्स्टेबल सुरक्षेसाठी तैनात असणार आहे. त्याच बरोबर एसआरपीएफच्या ६ तुकड्या आणि एक दंगल नियंत्रक पथक ही तैनात असेल. शिवाजी पार्कवर यावेळी टिफीन, पाण्याची बाटली आणि बॅग घेऊन जाण्यास मनाई करण्यात आलीय.

यंदा सुवर्ण महोत्सवी वर्ष साजरं करणाऱ्या शिवसेनेचा दसरा मेळावा आज शिवाजी पार्कवर पार पडतोय. पावसामुळे हुकलेल्या वर्धापन दिनाच्या खेळीची कसर भरुन काढण्याची तयारी शिवसैनिकांनी केलीय. शिवसेना भाजप वादामुळे अवघ्या देशाचं लक्ष या मेळाव्याकडे लागलंय.

शिवाजी पार्कची राजकीय खेळपट्टी तयार झालीय. शिवसेना तयारीनिशी आणि संपूर्ण ताकदीसह खेळायला उतरतेय. गेली पंधरा वर्षं विरोधी पक्षात असलेली शिवेसना यंदा सत्तेत असल्यानं फॉर्मात आहे. पण भाजपशी मतभेद झाल्यानं सूर हरवलाय. संघाचे कप्तान उद्धव ठाकरे यांच्यावरच पक्षातल्या खेळाडूंची भिस्त आहे. काँग्रेस राष्ट्रवादीपेक्षा भाजप हा शिवसेनेचा प्रतिस्पर्धी आहे. त्यामुळे उद्धव यांच्याकडून चांगल्या कामगिरीची शिवसैनिकांची अपेक्षा आहे. भाजप विरोधी चौकार आणि षटकार ठोकून ते सामन्यात रंगत आणू शकतात.

पाकिस्तानी कलावंत, खेळाडू आणि राजकारण्यांना महाराष्ट्रात मज्जाव करत शिवसेनेनं भाजपविरोधी आघाडी घेतलीय. पण अनुभवी बाळासाहेब ठाकरे आज हयात नाहीत याची जाणीव शिवसैनिकांना आहे. कल्याण डोंबिवली आणि त्यापाठोपाठ मुंबई ठाणे महापालिकेवर भगवा कायम ठेवण्याचं आव्हान शिवसेनेपुढे आहे. देशात आणि महाराष्ट्रात सत्ता कबीज केल्यानंतर भाजपचं पुढचं लक्ष्य मुंबई आहे. त्यामुळे दसरा मेळाव्यात उद्धव ठाकरेंना आपल्या शिलेदारांपुढे पक्षाची पुढची वाटचाल अधिक स्पष्टपणे मांडावी लागणार आहे.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.