జమ్మూ కాశ్మీర్ ముఖ్యమంత్రి మెహబూబా ముఫ్తీ తమ రాష్ట్ర ప్రభుత్వంలో పరిశ్రమల శాఖ మంత్రిగా ఉన్న చంద్ర ప్రకాష్ గంగా, అటవీశాఖ మంత్రిగా ఉన్న లాల్ సింగ్ రాజీనామా పత్రాలను ఆమోదించారు. వాటిని గవర్నర్ వద్దకు పంపారు. ఇటీవలే ఈ ఇద్దరు మంత్రులు కూడా వివాదంలో చిక్కుకున్నారు. కథువా అత్యాచార కేసులో నిందితులకు మద్దతు ఇస్తూ వీరు ర్యాలీలు నిర్వహించడంతో అనేక స్వచ్ఛంద సంస్థలు వీరిపై మండిపడ్డాయి.
రాష్ట్ర మంత్రులు నిందితులకు మద్దతు ఇవ్వడమేంటని ఆగ్రహం వ్యక్తం చేశాయి. ఈ క్రమంలో వారు ఈ రోజు తాము మంత్రి పదవులకు రాజీనామా చేస్తున్నట్లు ప్రకటించారు. ఈ మంత్రులు ఇద్దరూ రాజీనామా చేయనున్నట్లు రాష్ట్ర బీజేపీ ప్రతినిధి సత్ శర్మ కూడా తెలిపారు. ప్రతిపక్షాలు కూడా ఈ మంత్రులు చేసిన పని పట్ల తీవ్ర అభ్యంతరాన్ని వ్యక్తం చేశాయి.
ఈ క్రమంలో లాల్ సింగ్ మాట్లాడుతూ " నేను నైతిక విలువలను అనుసరించి రాజీనామా సమర్పించాను. నా వల్ల కొందరి మనోభావాలు దెబ్బతిన్నాయి కాబట్టి.. నాకు ఆ పదవిలో ఉండే అర్హత లేదని భావించాను. అలాగే నేను ఆత్మసాక్షిగా చెప్పేదేమిటంటే.. హింసకు ప్రేరేపించే ఏ విషయాన్ని కూడా నేను సమర్థించను. అందుకే రాజీనామా చేస్తున్నాను" అని తెలిపారు.
అలాగే తాను కథువా అత్యాచారం కేసులో తక్షణం సీబీఐ ఎంక్వయరీ వేయాలని డిమాండ్ చేస్తున్నానని తెలిపారు. ఈ రోజే ఇదే కేసుకు సంబంధించి దేశ రాజధానిలో కేంద్ర హెచ్‌ఆర్‌‌‌డీ మంత్రి ప్రకాష్ జవదేకర్ స్పందించారు. "కాంగ్రెస్ నేత గులామ్ అహ్మద్ మిర్ మాట్లాడుతూ జమ్మూ స్థానికుల్లో ఈ కేసులో అసలైన నిందితులు తప్పించుకుంటున్నారనే భావన ఉంది అన్నారు. అలాగే ఇన్వెస్టిగేషన్ కూడా సరిగ్గా జరగడం లేదని అంటున్నారు. మరి ఎందుకు రాహుల్ ఆయన పై చర్యలు తీసుకోలేదు" అని జవదేకర్ ప్రశ్నించారు
