સુરતની આ સ્વિટ્સ દેશ-વિદેશમાં મચાવે છે ધૂમ, સુરતીલાલા ઝાપટી જાય છે હજારો ટન

સુરત: કોઇ પણ વાર તહેવાર હોય સુરતીલાલાઓ ખાવાનો મોકો ચુકતા નથી, ત્યારે વાત આવે ચંદી પડવાની તો સુરતીલાલાઓ આ પર્વના દિને કરોડો રૂપિયાની ઘારીઓ આરોગી જતા હોય છે. આ ઉપરાંત આ ઘારી દેશ-વિદેશમાં પણ એકસપોર્ટ થતી હોય છે. આ વર્ષે મોંઘવારીને ધ્યાનમાં રાખી ઘારીના ભાવમા કિલોએ રૂ. 20નો વધારો કરવામાં આવ્યો છે.

સુરતની ઘારી જોતા જ મોઢામાં પાણી આવી જાય છે. મોટેભાગે ચંદી પડવાના પર્વ આવે ત્યારે સુરતીઓ સહિત દેશ-વિદેશમાં ખાવાના શોખીનો ઘારી પર તૂટી પડે છે. ત્યારે સુરતમાં અગાઉથી જ ઘારી બનાવવની તૈયારી શરૂ થઈ ગઈ છે. ચંદી પડવાના તહેવારમાં સુરતમાં જુદા-જુદા વેપારીઓ, સંસ્થાઓ અને ઘરઘથ્થુ હજારો ટન ઘારી બનાવાય છે. આ ઘારીમાં માવો, ઘી, એલચી, બદામ અને પીસ્તાને મિશ્ર કરી બનાવાય છે. અવનવી વેરાયટીમાં પણ આ ઘારી મળે છે. આ વર્ષે ઘારીના ભાવમાં 20 રૂપિયાનો વધારો થયો છે તેમ છતાં સુરતીઓ કરોડોની ઘારી આરોગવા અગાઉથી જ બુકિંગ કરાવી દીધું છે.

આ વર્ષે સુમુલ ડેરી દ્વારા ડાયાબિટીસના દર્દી તેમજ હેલ્થ કોન્સીયસ લોકોમા માટે પ્રથમ વાર સુગર ફ્રી ઘારી બનાવવામાં આવી છે. આ ઘારી ભલે સુગર ફ્રી હોય પંરતુ તેનો સ્વાદ અસ્સલ જે રુટિન ઘારી ખાતા હોય તેવો જ આવે છે. સુગર ફ્રી ઘારીનો ભાવ રુટિન ઘારી કરતા કિલો દીઠ રુ 50 થી લઇ 100  વધુ લેવામા આવતો હોય છે.

સુરતની આ ઘારી દેશ વિદેશમાં પણ ધૂમ મચાવી રહી છે. દર વર્ષે વિદેશમા હજ્જારો ટન જેટલી ઘારીઓ એકસપોર્ટ કરવામા આવતી હોય છે. વિદેશમા રહેતા ગુજરાતીઓ પણ ઘારીનો સ્વાદ માણી શકે તે માટે આ વર્ષે વિશિષ્ટ પ્રકારનું સેમ્પલ તૈયાર કરવામાં આવ્યું છે. જેમા ઘારીને વ્યવસ્થિત પેકીંગ કરી એકસપોર્ટ કરાતી હોય છે.