ગુજરાતમાં ભાજપની સૌથી સુરક્ષિત બેઠક : અહીં મોદી લહેરમાં સામે કોઈ ટકી શક્યુ નથી

Vadodara Lokasbha : ગુજરાતની અનેક બેઠકો ભાજપનો ગઢ માનવામાં આવે છે. આ બેઠકો માટે એવું કહેવાય છે કે, અહી મોદીના નામે વોટ મળે છે. પરંતું તેમાં એક બેઠક એવી છે, જે ભાજપનો ગઢ ગણાય છે. અહીં માત્ર અને માત્ર ભાજપનો જ દબદબો હોય છે. આ બેઠક છે વડોદરા લોકસભા બેઠક. 'વડોદરા' લોકસભા સીટ ગુજરાતમાં સૌથી સુરક્ષિત માનવામાં આવે છે. નરેન્દ્ર મોદી અહીંથી ભાજપના ઉમેદવાર ન હોવા છતાં તેમના નામ પર જ વોટ મળે છે. વડોદરાના મતદારોને માત્ર મોદી સાથે મતલબ હોય છે, ઉમેદવાર સાથે નહીં. 

વડોદરા જિલ્લાની વાત કરીએ તો, અહીં શહેર અને ગ્રામ્ય બંને વિસ્તારોમાં ભાજપની કોઈ સાથે સ્પર્ધા નથી. વડોદરા શહેરમાં ચારેતરફ ભગવો લહેરાયેલો જોવા મળે છે, હાલ લોકસભામાં પણ ભાજપના પોસ્ટરો દેખાઈ રહ્યા છે, પરંતુ કોંગ્રેસનો પ્રચાર ગાયબ છે. મતદારોએ એમ પણ કહ્યું કે અહી ભાજપ લહેર છે, અને મોદી લહેર છે. મતદારો કહે છે કે, આ વખતે ભાજપની જીતનું માર્જીન થોડું ઓછું થઈ શકે છે. 

ભાજપ લહેરમાં સારી બાબત એ છે કે, વડોદરામાં ક્ષત્રિય સમાજના વિરોધની કોઈ અસર જોવા મળી રહી નથી. જો કે કોંગ્રેસ પાર્ટીએ ભાજપના ઉમેદવાર ડો.હેમાંગ જોશી સામે ક્ષત્રિય સમાજમાંથી આવતા જસપાલસિંહ પઢિયારને મેદાનમાં ઉતાર્યા છે. છતાં વડોદરામાં ક્ષત્રિય આંદોલનની એવી કોઈ અસર જોવા મળી ન હતી

2014ની લોકસભા ચૂંટણીમાં નરેન્દ્ર મોદીએ વડોદરાથી બમ્પર જીત નોંધાવી હતી. ભાજપ 1998થી સતત આ બેઠક જીતી રહ્યું છે. છેલ્લી લોકસભાની ચૂંટણીમાં રંજનબેન ભટ્ટનો વિજય થયો હતો. તેમણે કોંગ્રેસના પ્રશાંત ચંદુભાઈ પટેલને હરાવ્યા હતા. રંજનબેન ભટ્ટને 883,719 મત મળ્યા. જ્યારે કોંગ્રેસના ચંદુભાઈ પટેલને 294,542 મત મળ્યા. વડોદરામાં સાત વિધાનસભા મતવિસ્તાર, સયાજીગંજ, રાવપુરા, માંજલપુર, વાઘોડિયા, સાવલી, અકોટા અને વડોદરા શહેરનો સમાવેશ થાય છે. 

અમે વડાપ્રધાન નરેન્દ્ર મોદીને જોઈએ છીએ, ઉમેદવારને નહીં
વડોદરા નજીક સોખડા ગામમાં એક મતદારે કહ્યું કે, અહીં ભાજપને જ મતો છે. ડો.હેમાંગ જોશી જીતશે. આ વિસ્તારમાં વડાપ્રધાન નરેન્દ્ર મોદીનો પ્રભાવ છે. વડોદરામાં કેન્દ્રીય મંત્રી પરષોત્તમ રૂપાલા અંગે કોઈ વિવાદ નથી. અન્ય એક મતદારે કહ્યું, અહીં વિકાસ થયો છે. રોડ બન્યા છે, પાણીનો ઉકેલ મોદીએ શોધી કાઢ્યો છે. ગટર લાઇન હજુ બાકી છે, તે પણ આવશે. અહીં અમને ઉમેદવાર નથી દેખાતા, વડાપ્રધાન નરેન્દ્ર મોદી દેખાય છે. જનતાનો મત મોદીને જશે, ઉમેદવારને નહીં.

જીતશે, પરંતુ ભાજપની લીડ ઓછી રહેશે
વડોદરાના મતદારોએ કહ્યું કે, વડાપ્રધાન નરેન્દ્ર મોદી જ્યારથી મુખ્યમંત્રી હતા ત્યારથી તેમને મત આપી રહ્યા છે. કોંગ્રેસે અગાઉ ક્યારેય કામ કર્યું નથી. કોંગ્રેસે અગાઉ ક્યારેય કામ કર્યું નથી. તેઓ માત્ર ઉમેદવારો ઉભા રાખે છે. કોઈ પણ બેઠક હોય, અહીં માત્ર ભાજપને જ મત આપવામાં આવશે. કેન્દ્રીય મંત્રી રૂપાલાના નિવેદનની અહીં બહુ ઓછી અસર જોવા મળી છે. ક્ષત્રિય સમાજ ભેગા થશે. તેઓ ભાજપને મત આપશે. માત્ર ભાજપની લીડ ઘટશે. રૂપાલા એક વ્યક્તિ છે, દેશમાં ભાજપ છે. ઓછા માર્જિનનું કારણ સમજાવતા લોકોએ કહ્યું કે, પરિવર્તન એ કુદરતનો નિયમ છે. જે કામ ભાજપે કર્યું છે તે કોંગ્રેસ કરી શકતી નથી. મોદીને તેમના લોકોની ચિંતા છે.