2020ની શરૂઆતમાં જ ISROએ સર્જયો રેકોર્ડ, તાકાતવાર ઉપગ્રહ GSAT-30 કર્યો લોન્ચ

નવી દિલ્હી :ભારતીય અંતરિક્ષ અનુસંધાન સંગઠને (ISRO) મોટી સફળતા મેળવતા તાકાતવર સંચાર ઉપગ્રહ જીસેટ-30 (GSAT-30) ને સફળતાપૂર્વક લોન્ચ કર્યો છે. ઈસરોનું GSAT-30 યુરોપિયન હેવી રોકેટ એરિયન-5 (Ariane-5)  દ્વારા શુક્રવારે વહેલી સવારે 2.35 મિનીટ પર છોડવામાં આવ્યું, જે જિયોસિંક્રોનસ ટ્રાન્સફર ઓર્બિટમાં સફળતાપૂર્વક લોન્ચ થયો. આ રીતે ભારતે આ વર્ષે એટલે 2020ના પહેલા મિશનને સફળતાની સાથે પૂરું કર્યું. આ ઉપગ્રહ ભારતની ટેલિકમ્યુનિકેશન સેવાઓને વધુ સારી બનાવવામાં મદદ કરશે. જીસેટ-30 સંચાર ઉપગ્રહ ઈનસેટ-4એની જગ્યા લેશે. જેને વર્ષ 2005માં લોન્ચ કરવામાં આવ્યો હતો.

હકીકતમાં GSAT-30 ઈસરો દ્વારા ડિઝાઈન કરવામાં આવ્યો છે અને બનાવવામાં આવ્યો છે. તે એક દૂરસંચાર ઉપગ્રહ છે. જે એક ઈનસેટ સેટેલાઈટની જગ્યાએ કામ કરશે. તેનાથી રાજ્ય-સંચાલિત અને અંગત સેવા આપનારને સંચાર લિંક
આપવાની ક્ષમતામાં વધારો થશે. 

આ ઉપગ્રહનું વજન અંદાજે 3100 કિલોગ્રામ છે. લોન્ચિંગ બાદ 15 વર્ષો સુધી તે કામ કરતું રહેશે. તેમાં બે સોલાર પેનલ અને બેટરી છે, જેનાથી તેને ઉર્જા મળશે. 

જીસેટ-30ની ખાસિયત...

• GSAT-30ની કવરેજ ક્ષમતા ઈનસેટ-4એ કરતા વધુ છે.
• આ ઉપગ્રહ કેયુ બેન્ડમાં ભારતીય મુખ્ય વિસ્તાર અને ટાપુઓને, સી બેન્ડમાં ખાડી દેશો, એશિયાઈ દેશો અને ઓસ્ટ્રેલિયાને કવર કરશે.
• તેનો ઉપયોગ વ્યાપક રૂપથી વીસેટ નેટવર્ક, ટેલિવિઝન અપકિલિંગ, ટેલિપોર્ટ સેવા, ડિજીટલ સેટેલાઈટ ખબર સંગ્રહણ, ડીટીએચ ટેલિવિઝન વગેરે સેવાઓ માટે કરવામાં આવશે.