Weather Forecast: શિયાળામાં પણ વરસાદ વધારશે મુશ્કેલી? IMD એ આ વિસ્તારો માટે જાહેર કર્યું ઓરેન્જ એલર્ટ, સાચવીને રહેજો

નવેમ્બરનો મહિનો પૂરો થવાની તૈયારીમાં છે અને ઉત્તર ભારતીય રાજ્યોમાં ઠંડી દેકારો દઈ રહી છે ત્યારે કેટલાક રાજ્યોમાં વરસાદે હજુ પણ લોકોને હેરાન પરેશાન કરી રાખ્યા છે. ભારતીય હવામાન વિભાગે 23 નવેમ્બર સુધી અનેક રાજ્યોમાં ભારે વરસાદની આગાહી કરી છે. હવામાન વિભાગે લોકોને અપીલ કરી છે કે પાણી ભરાતા હોય, કાચા રસ્તા અને ભીડભાડવાળા વિસ્તારોમાં જવાથી બચજો. જાણો ગુજરાત માટે શું કરાઈ છે આગાહી. 

આ રાજ્યોમાં ભારે વરસાદની ચેતવણી
ભારતીય હવામાન વિભાગે 23 નવેમ્બર સુધી કેટલાક રાજ્યોમાં ભારે વરસાદની આગાહી કરેલી છે. ખાસ કરીને દક્ષિણ ભારતીય રાજ્યો તમિલનાડુ, પુડુચેરી, અને આંધ્ર પ્રદેશમાં ઓરેન્જ એલર્ટ જાહેર કરેલું છે. આઈએમડીએ કેરળ અને માહે માટે પણ ચેતવણી બહાર પાડી છે. કહ્યું છે કે 22 અને 23 નવેમ્બરે ભારે વરસાદની શક્યતા છે. છેલ્લા બે અઠવાડિયાથી તમિલનાડુના અનેક ભાગોમાં મધ્યમથી ભારે વરસાદ પડી રહ્યો છે. જેના કારણે ચેન્નાઈમાં શાળાઓ બંધ કરી દવાઈ છે. 

આઈએમડીએ સોશિયલ મીડિયા પ્લેટફોર્મ એક્સ પર એક પોસ્ટમાં લખ્યું છે કે તમિલનાડુ, પુડુચેરી અને કરાઈકલમાં ભારેથી અતિભારે વરસાદ પડવાની શક્યતા છે. લોકોને અપીલ છે કે વરસાદના કારણે બહાર પાડવામાં આવેલા ઓરેન્જ એલર્ટ દરમિયાન  પાણી ભરાતા હોય, કાચા રસ્તા અને ભીડભાડવાળા વિસ્તારોમાં જવાથી બચજો અને લોકોને જાગૃત પણ કરો. સાવધાન રહો. સુરક્ષિત રહો. 

શાળાઓ બંધ
છેલ્લા બે અઠવાડિયાથી તમિલનાડુના અનેક ભાગોમાં મધ્યમથી ભારે વરસાદ પડી રહ્યો છે. જેના કારણે પાણી ભરાયા છે અને શાળાઓ બંધ કરાઈ છે. ભારતીય હવામાન વિભાગે આંધ્ર પ્રદેશના કેટલાક ભાગોમાં ભારે વરસાદ અને 23 નવેમ્બર સુધી તોફાનની આગાહી કરી છે. 

ગુજરાતમાં શું રહેશે સ્થિતિ
 આખરે રાજ્યમાં ઠંડી અસર વર્તાવાની શરૂઆત થઈ ગઈ છે. ત્યારે ગુજરાતમાં ફરી એકવાર કમોસમી વરસાદની આગાહી આવી ગઈ છે. ઠંડીના ચમકારા વચ્ચે કમોસમી વરસાદ આવી પડશે. કેટલાક હવામાન એક્સપર્ટસના જણાવ્યા અનુસાર, રાજ્યમાં 26મી તારીખ સુધી વાતાવરણમાં પલટા સાથે અનેક વિસ્તારોમાં માવઠાની શક્યતા છે.

હવામાન વિભાગે પણ કમોસમી વરસાદની આગાહી કરી દીધી છે. હવામાન વિભાગે જણાવ્યું કે, આગામી 5 દિવસ વાતાવરણ સૂકું રહેશે. ગુજરાતમાં કમોસમી વરસાદની આગાહી છે. 25 થી 26 નવેમ્બર સામાન્યથી મધ્યમ વરસાદની આગાહી છે. સૌરાષ્ટ્રમાં વરસાદ બાદ તાપમાન ધીમે ધીમે ઘટવાનું અનુમાન છે. વાતાવરણમાં ભેજનું પ્રમાણ વધશે. જેના કારણે સૌરાષ્ટ્રમાં કમોસમી વરસાદની શક્યતા છે. 

25 નવેમ્બરની વાત કરવામાં આવે તો દાહોદ, પંચમહાલ, અમરેલી, દ્વારકા, ગીર સોમનાથ, જૂનાગઢ, પોરબંદર, રાજકોટમાં વરસાદની આગાહી કરાઈ છે. 26 નવેમ્બરે આણંદ, અરવલ્લી, ખેડા, મહીસાગર, મહેસાણા, અમરેલી , ભાવનગર, ગીર સોમનાથ, રાજકોટ સહિત દક્ષિણ ગુજરાતના તમામ જિલ્લામાં વરસાદની આગાહી છે. 

ક્યાં ક્યાં કમોસમી વરસાદ આવશે
હવામાન શાસ્ત્રીના અનુસાર, ગુજરાતમાં આજથી વાતાવરણ પલટાશે, જેની અસર દક્ષિણ ગુજરાતમાં જોવા મળશે. દક્ષિણ ગુજરાતના વિસ્તારો અને એમા પણ ખાસ કરીને મહારાષ્ટ્રના બોર્ડર સાથે સંકળાયેલા વિસ્તારોને મોટી અસર થશે. જેમકે વલસાડ, વાપી, ઉદવાડા, ધરમપુર, સેલવાસામાં હવામાનમાં પલટો આવશે. તો એકલ દોકલ જગ્યાએ એકદમ સામાન્ય છૂટાછવાયા માવઠા થઇ શકે છે.  સૌરાષ્ટ્ર અને કચ્છના વિસ્તારોમાં 24થી 26 તારીખમાં માવઠું થઇ શકે છે. જોકે, તે પણ એકદમ સામાન્ય માવઠું હશે અને સામાન્ય અને સાર્વત્રિક વરસાદ નહીં પડે પરંતુ છૂટાછવાયો વરસાદ હશે.

ઠંડીની આગાહી
રાજ્યવાસીઓને ઠંડીનો અનુભવ થઈ શકે છે. બે દિવસ બાદ તાપમાનમાં 2 ડિગ્રી કરતા વધુ ઘટાડો આવી શકે છે. જોકે, હવામાન વિભાગની આગાહી અનુસાર, હાલ વરસાદને લઈને કોઈ શકયતા નથી. કેટલાક સ્થળો પર વાદળછાયુ વાતાવરણ રહી શકે છે. હવામાન વિભાગના ડાયેરક્ટર ડો.મનોરમા મોહંતીએ જણાવ્યું કે, દિવસ અને રાત્રી દરમિયાન તાપમાનમાં કોઈ ફેરફાર નહીં થાય. બે ડિગ્રી જેટલું તાપમાન અપ એન્ડ ડાઉન રહી શકે છે. દિવસ દરમિયાન 35 ડિગ્રી આસપાસ અને રાત્રે 20 ડિગ્રી આસપાસ તાપમાન રહી શકે છે. ડિસેમ્બર અંતમાં ઠંડીનો ખરો ચમકારો અનુભવ થશે. હાલ કોઈ સિસ્ટમ ગુજરાતને લઈને સક્રિય નથી. માત્ર લોકલ એક્ટિવિટીના કારણે છેલ્લા બે દિવસમાં રાજ્યમાં કેટલાક સ્થળો પર વરસાદી માહોલ રહ્યો છે. સૌરાષ્ટ્રના કેટલાક વિસ્તારમાં વાદળછાયું વાતાવરણ રહી શકે છે.