CSK vs KKR: ફાઇનલમાં ફેલ KKR, ધોનીની ટીમે કર્યો કમાલ, ચેન્નઈએ ચોથી વખત જીતી આઈપીએલની ટ્રોફી

દુબઈઃ મહેન્દ્ર સિંહ ધોનીની આગેવાનીમાં ચેન્નઈ સુપર કિંગ્સે આઈપીએલ-2021 ફાઇનલમાં કોલકત્તા નાઇટ રાઇડર્સને 27 રને પરાજય આપી ચોથી વખત ટ્રોફી પર કબજો કર્યો છે. 2020માં લીગ રાઉન્ડમાં બહાર થઈ જનાર ધોનીની ટીમે આ વખતે કમાલ કરી દીધો છે. ચેન્નઈ સુપર કિંગ્સ 2018 બાદ ફરી વિજેતા બન્યું છે. આ પહેલા ચેન્નઈની ટીમ 2010, 2011, 2018માં આઈપીએલની ટ્રોફી જીતી ચુકી છે. ચેન્નઈ સુપર કિંગ્સ 9મી વખત આઈપીએલ ફાઇનલમાં પહોંચ્યું હતું. પ્રથમ બેટિંગ કરતા ચેન્નઈએ 20 ઓવરમાં 3 વિકેટે 192 રન બનાવ્યા હતા. જેના જવાબમાં કોલકત્તાની ટીમ 20 ઓવરમાં 9 વિકેટે 165 રન બનાવી શકી હતી. 

કોલકત્તાના બંને ઓપનરોની અડધી સદી
ચેન્નઈએ આપેલા પહાડી લક્ષ્યનો પીછો કરવા ઉતરેલી કોલકત્તા નાઇટ રાઇડર્સે મજબૂત શરૂઆત કરી હતી. શુભમન ગિલ અને વેંકટેશ અય્યરે પાવરપ્લેમાં 55 રન જોડી દીધા હતા. ગિલ અને વેંકટેશે પ્રથમ વિકેટ માટે 91 રનની ભાગીદારી કરી હતી. 

વેંકટેશ અય્યરે આ સીઝનની ચોથી અડદી સદી ફટકારતા 51 રન બનાવ્યા હતા. અય્યર 51 રન બનાવી ચાહરનો શિકાર બન્યો હતો. શુભમન ગિલ 50 રન બનાવી આઉટ થયો હતો. નીતિશ રાણા શૂન્ય રન બનાવી આઉટ થયો હતો. સુનીલ નારાયણ બે રન બનાવી હેઝલવુડનો શિકાર બન્યો હતો. કેપ્ટન ઇયોન મોર્ગન માત્ર 4 રન બનાવી આઉટ થયો હતો. મોર્ગનની વિકેટ હેઝલવુડને મળી હતી. 

દિનેશ કાર્તિક 9 રન બનાવી જાડેજાનો શિકાર બન્યો હતો. શાકિબ અલ-હસન શૂન્ય રને જાડેજાની ઓવરમાં LBW આઉટ થયો હતો. રાહુલ ત્રિપાઠી માત્ર બે રન બનાવી શક્યો હતો. શિવમ માવી 13 બોલમાં 20 રન બનાવી આઉટ થયો હતો. 

ચેન્નઈ તરફથી હોશ હેઝલવુડ અને રવિન્દ્ર જાડેજાએ બે, દીપક ચાહરે એક અને શાર્દુલ ઠાકુરે ત્રણ અને બ્રાવોને એક સફળતા મળી હતી. 

ચેન્નઈને ફરી મળી સારી શરૂઆત
ટોસ હારીને પ્રથમ બેટિંગ કરવા ઉતરેલી ચેન્નઈને ફાફ ડુ પ્લેસિસ અને ઋતુરાજ ગાયકવાડે દમદાર શરૂઆત અપાવી હતી. બંનેએ પારવપ્લેમાં 50 રન જોડી દીધા હતા. ચેન્નઈને પ્રથમ ઝટકો ઈનિંગની 9મી ઓવરમાં ગાયકવાડના રૂપમાં લાગ્યો હતો. ગાયકવાડ 27 બોલમાં ત્રણ ચોગ્ગા અને એક સિક્સ સાથે 32 રન બનાવી સુનીલ નારાયણનો શિકાર બન્યો હતો. 

ફાફ ડુ પ્લેસિસ ઈનિંગના છેલ્લા બોલે થયો આઉટ
ચેન્નઈના સીનિયર ઓપનર ફાફ ડુ પ્લેસિસે ચેન્નઈની ઈનિંગની કમાન સંભાળી હતી. ફાફે પ્રથમ વિકેટ માટે ગાયકવાડ સાથે 61 રન તો ઉથપ્પા સાથે બીજી વિકેટ માટે 63 રનની ભાગીદારી કરી હતી. મોઇન અલી અને ડુ પ્લેસિસે ત્રીજી વિકેટ માટે 68 રનની ભાગીદારી કરી હતી. ફાફ ડુ પ્લેસિસે 57 બોલનો સામનો કરતા 86 રન બનાવ્યા હતા. તેણે પોતાની ઈનિંગમાં ત્રણ સિક્સ અને 7 ચોગ્ગા ફટકાર્યા હતા. 

મોઇન અલી અને રોહિન ઉથપ્પાની આક્રમક ઈનિંગ
ત્રીજા ક્રમે બેટિંગ કરવા આવેલા રોબિન ઉથપ્પાએ ચેન્નઈની ઈનિંગને ગતિ આપી હતી. ઉથપ્પાએ માત્ર 15 બોલમાં ત્રણ સિક્સ સાથે 31 રનની ઈનિંગ રમી હતી. મોઇન અલીએ પણ અંતિમ ઓવરોમાં આક્રમક બેટિંગ કરી ટીમનો સ્કોર 190ને પાર પહોંચાડવામાં મદદ કરી હતી. મોઇન અલી 20 બોલમાં બે ચોગ્ગા અને ત્રણ છગ્ગા સાથે 37 રન બનાવી અણનમ રહ્યો હતો. 

સુનીલ નારાયણ કોલકત્તા તરફથી સફળ બેટ્સમેન
કોલકત્તા તરફથી સુનીલ નારાયણ સૌથી સફળ બોલર રહ્યો હતો. નારાયણે 4 ઓવરમાં માત્ર 26 રન આપી બે વિકેટ ઝડપી હતી. તો શિવમ માવીએ 4 ઓવરમાં 32 રન આપી એક વિકેટ મેળવી હતી.