ઈન્ડોનેશિયા માસ્ટર્સઃ સાઇના બાદ પીવી સિંધુ પણ હારી, ટૂર્નામેન્ટમાં ભારતીય પડકારનો અંત

જકાર્તાઃ ભારતની નંબર-1 શટલર પીવી સિંધુએ ગુરૂવારે ઈન્ડોનેશિયા માસ્ટર્સ (Indonesia Masters)ના બીજા રાઉન્ડમાં હારનો સામનો કરવો પડ્યો છે. પીવી સિંધુ (PV Sindhu)ની હારની સાથે આ ટૂર્નામેન્ટમાં ભારતીય પડકારનો અંત આવી ગયો છે. પાંચમી સીડ સિંધુએ પોતાના બીજા રાઉન્ડના મુકાબલામાં સયાકા તાકાહાશીના હાથે ત્રણ ગેમ સુધી ચાલેલા સંઘર્ષપૂર્ણ મુકાબલામાં 21-16, 16-21, 19-21થી હારનો સામનો કરવો પડ્યો હતો. 

જાપાનની સયાકા તાકાહાશી (Sayaka Takahashia)એ પોતાના પ્રથમ રાઉન્ડના મુકાબલામાં ભારતની સાઇના નેહવાલને પરાજય આપ્યો હતો. હવે તેણે વર્લ્ડ નંબર-6 સિંધુને પણ એક કલાક છ મિનિટ સુધી ચાલેલા મુકાબલામાં હરાવીને ક્વાર્ટર ફાઇનલમાં પ્રવેશ કર્યો હતો. ક્વાર્ટર ફાઇનલમાં તાકાહાશીનો સામનો વાંગ ઝી યી સામે થશે. 

આ જીતની સાથે સયાકા તાકાહાશીએ પીવી સિંધુ વિરુદ્ધ પોતાના કરિયરનો રેકોર્ડ 3-4નો કરી લીધો છે. સિંધુ આ પહેલા વર્ષની પ્રથમ ટૂર્નામેન્ટ મલેશિયા માસ્ટર્સના ક્વાર્ટર ફાઇનલમાં બહાર થઈ ગઈ હતી. 

ઈન્ડોનેશિયા માસ્ટર્સમાં આ પહેલા બુધવારે સાઇના નેહવાલ, કિદાંબી શ્રીકાંત, સૌરભ વર્મા, બી સાઈ પ્રણીત, પારૂપલ્લી કશ્યપ અને એચએસ પ્રણોયને પ્રથમ રાઉન્ડમાં હારીને બહાર થવું પડ્યું હતું. 

જુઓ LIVE TV