சீனாவின் முகத்திரை கிழிந்தது...ஈட்டிகளை ஏந்திய சீன படையினர் புகைப்படம் வெளியீடு..!!

ஈட்டிகள் கொடூரமான ஆயுதங்கள் ஏந்திய சீன படையினரின் புகைப்படத்தை வெளியிட்டு சீனாவின் முகத்திரையை இந்திய ராணுவம் கிழித்துள்ளது.

புதுடெல்லி: கிழக்கு லடாக்(Ladakh)  பகுதியில் பாங்கோங் திசோவின் (Pangong tso) தென் கரையில் உள்ள எல் ஏ சி (LAC) பகுதியில்  சீனத் துருப்புக்கள் அத்துமீறி நுழைந்து  துப்பாக்கிச் சூடு நடத்தியதாகக் கூறப்பட்ட ஒரு நாள் கழித்து, இந்திய இராணுவம், ஈட்டிகள் கொடூரமான ஆயுதங்கள் ஏந்திய சீன படையினரின் புகைப்படத்தை வெளியிட்டு சீனாவின் முகத்திரையை கிழித்துள்ளது.

இதன் மூலம் கல்வான் பள்ளத்தாக்கை விட மோசமான தாக்குதலை நடத்த சீனா நரி தந்திரம் செய்தது அம்பலமாகியுள்ளது.

ஆனால், இந்தியா, தக்க பதிலடி கொடுத்து, பாங்காங் திசோ உட்பட முக்கியத்துவம் வாய்ந்த மலைப்பகுதிகளை தொடர்ந்து தனது கட்டுபாட்டில் வைத்துக் கொண்டுள்ளது என்பது குறிப்பிடத்தக்கது. 

திங்களன்று சீனா தான் வேண்டுமென்றே ஆத்திரமூட்டும் நடவடிக்கைகளை மேற்கொண்டது என்ற இந்திய இராணுவத்தின் நிலைப்பாட்டை இந்த படங்கள் நிரூபிக்கின்றன

இந்திய வீரர்கள் எல்லை கடந்து தாக்குதல் நடத்தியதாக சீனா கூறியதை இந்தியா கடுமையாக நிராகரித்துள்ளது.

"எல்.ஏ.சி யில் (LAC)  இரு நாடுகளின் துருப்புகள்  பின் வாங்க வேண்டும் என்றும் பதற்றம் குறைய வேண்டும் எனவும் இந்தியா உறுதிபூண்டுள்ள நிலையில், சீனா தொடர்ந்து ஆத்திரமூட்டும் நடவடிக்கைகளை மேற்கொண்டு வருகிறது" என்று இந்திய இராணுவம் இன்று முன்னதாக வெளியிட்ட ஒரு அறிக்கையில் கூறியது, இது சீனா அப்பட்டமாக ஒப்பந்தங்களை மீறி செயல்பட்டு வருகிறது ஆக்கிரமிப்பு சூழ்ச்சிகள்.

"பாங்கோங் ஏரி பகுதியின் தெற்கு கரையைச் சுற்றியுள்ள மூலோபாய சிகரங்களில் இந்தியா தொடர்ந்து ஆதிக்கம் செலுத்துகிறது. இந்திய இராணுவம் சீன ராணுவத்தின் ஆக்கிரமிப்பு நடவடிக்கைகளை தடுத்த போது, திங்கள்கிழமை மாலை நமது, துருப்புக்களை அச்சுறுத்துவதற்காக அவர்கள் 10-15 முறை வானில் சுட்டனர், ”என்று இந்திய அரசாங்கம் வலியுறுத்தியது.

"இந்தியாவின் நடவடிக்கை ஒரு, தீவிரமான இராணுவ ரீதியிலான  ஆத்திரமூட்டும் நடவடிக்கையாக கருதப்படுகிறது," என்று சீன வெளியுறவு அமைச்சக செய்தித் தொடர்பாளர் ஜாவோ லிஜியன் கூறினார்.

இந்தியா தனது தாக்குதல் நடவடிக்கையை நிறுத்திக் கொள்ள வேண்டும் என்று பெய்ஜிங், இந்திய தரப்பைக் கோரியது.

எல்லைப் பகுதியில் துப்பாக்கிகளைப் பயன்படுத்தக் கூடாது என சீனாவுக்கும் இந்தியாவுக்கும் இடையில் நீண்ட நாள் ஒப்பந்தம் உள்ளது. ஆனால் இதனால், உயிரிழப்புகள் தவிர்க்கப்படவில்லை என்பது குறிப்பிடத்தக்கது.

ஜூன் மாதம் கால்வான் பள்ளத்தாக்கில் சீன துருப்புக்களுடன் வன்முறை மோதல்களில் 20 இந்திய வீரர்கள் கொல்லப்பட்டதை அடுத்து இந்திய சீன எல்லையில் தொடர்ந்து பதற்றம் நிலவுகிறது.

இருதரப்பினரும்  எல்லை பதற்றத்தை தீர்க்க ராஜீய நிலைகளிலும் மற்றும் இராணுவ நிலைகளிலும் பேச்சுவார்த்தைகளில் ஈடுபட்டிருந்தபோது, ​​பாங்காங் ஏரியின் தெற்கு கரையில் இந்தியப் பகுதியை ஆக்கிரமிக்க சீனா முயன்றது. அதனை நமது வீரர்கள் வெற்றிகரமாக முறியடித்தனர். இதனால் பதற்றம் மேலும் அதிகரித்தது.