అమరావతిని ప్రత్యేక వ్యవసాయ జోన్‌గా ప్రకటించే ఆలోచనలో సర్కార్ ?

ఏపీకి మూడు రాజధానుల ఏర్పాటు ప్రతిపాదన ప్రకటన అనంతరం రైతుల ఆందోళనలకు వేదికగా మారిన అమరావతిపై త్వరలోనే ఏపీ సర్కార్ నుంచి మరో ప్రకటన వెలువడనుందనే వార్తలు వెలువడుతున్నాయి. అమరావతి ప్రాంత రైతులకు మేలు చేకూర్చేలా ఆ ప్రాంతాన్ని వాణిజ్య పరంగా అత్యంత విలువైన పంటలకు హబ్‌గా తీర్చిదిద్దేలా అక్కడ ప్రత్యేక అగ్రికల్చర్ జోన్‌గా ప్రకటించే అంశాన్ని ప్రభుత్వం పరిశీలిస్తోందని తెలుస్తోంది.

అమరావతి: ఏపీ రాజధాని అమరావతి ప్రాంతాన్ని ప్రత్యేక అగ్రికల్చర్ జోన్‌గా ప్రకటించే అంశాన్ని ప్రభుత్వం పరిశీలిస్తోందని తెలుస్తోంది. అమరావతి రాజధాని నిర్మాణంలో భాగంగా ఇప్పటికే నిర్మించిన రోడ్లు, భవనాలను యధాతధంగా వినియోగిస్తూ.. మిగులు భూమిని స్పెషల్ అగ్రికల్చర్ జోన్ (Special Agriculture Zone)గా ఉపయోగించుకోవాలని ఏపీ సర్కార్ ఆలోచిస్తున్నట్టు వార్తలు వెలువడుతున్నాయి. ఇప్పటికే దీనిపై ఓ నివేదికతో కూడిన ప్రతిపాదనను వ్యవసాయ శాఖ నిపుణులు సిద్దం చేశారని... రాష్ట్రంలోని వ్యవసాయ విశ్వవిద్యాలయాలు, వ్యవసాయ శాస్త్రవేత్తల పరిశోధనలకు కేంద్రంగా అభివృద్ధి చేసేందుకు అమరావతి ప్రాంతం అనుకూలమని నిపుణులు ఆ నివేదికలో సూచించారని సమాచారం. నిపుణుల సూచనల మేరకు ల్యాండ్ పూలింగ్ భూములు సహా ప్రభుత్వ భూములనూ ఈ స్పెషల్ అగ్రికల్చర్ జోన్‌ పరిధిలోకి తీసుకొచ్చి... కాలక్రమంలో వాణిజ్య పరంగా అత్యంత విలువైన పంటలకు హబ్‌గా అమరావతి ప్రాంతాన్ని అభివృద్ధి చేయాలని రాష్ట్ర ప్రభుత్వం ప్రణాళికలు రచిస్తోంది.