హైదరాబాద్: తమ పార్టీకి గాజు గ్లాస్ గుర్తును కేటాయించినందుకు జనసేన పార్టీ భారత ఎన్నికల సంఘానికి కృతజ్ఞతలు తెలియజేసింది. కర్షకులు, కార్మికులు, సామాన్యులు ఛాయ సేవించి తమ ఆకలిని తీర్చుకునేందుకు ఉపయోగపడే గాజు గ్లాసు గుర్తును భారత ఎన్నికల సంఘం కేటాయించడం తమకు ఆనందంగా ఉందని జనసేన పార్టీ అభిప్రాయపడింది. సామాన్యుల సంక్షేమం కోసమే పార్టీని స్థాపించి, ప్రజలకు చేరువవుతున్న పవన్ కల్యాణ్ మనోభావాలు, భావజాలానికి తగినట్టుగానే ఇవాళ భారత ఎన్నికల సంఘం గాజు గ్లాస్ గుర్తును కేటాయించడాన్ని ఆ భగవంతుని ఆశీర్వాదంగా భావిస్తున్నట్టు జనసేన పార్టీ పేర్కొంది. ఈ మేరకు జనసేన పార్టీ తమ అధికారిక యూట్యూబ్ ఛానెల్ ద్వారా ఓ ప్రెస్ మీట్ వీడియోను విడుదల చేసింది.
