విక్టరీ వెంకటేష్ త్వరలోనే వెంకీ మామ అనిపించుకోబోతున్నాడు. అలా అని వెంకీ ఇంటికి కొత్తగా అల్లుడో, లేక కోడలో రావడం లేదండోయ్!! మరి అటువంటప్పుడు వెంకీ కాస్తా వెంకీ మామ ఎలా అవుతున్నాడనే కదా మీ డౌట్! అయితే, అక్కడికే వస్తున్నా.. ప్రస్తుతం అనిల్ రావిపూడి డైరెక్షన్‌లో చేస్తున్న F2 సినిమాతో బిజీగా ఉన్న వెంకీ ఆ తర్వాత జై లవ కుశ ఫేమ్ బాబీ దర్శకత్వంలో ఓ సినిమా చేయనున్నాడు. ఈ సినిమాలో వెంకీ మేనల్లుడు నాగచైతన్య కూడా నటించనుండటం విశేషం. వెంకీ-చైతూ ఇద్దరూ కలిసి నటిస్తున్న ఈ మల్టీస్టారర్‌కి కోన వెంకట్ కథ అందిస్తున్నాడు. ఈ సినిమాకు కోన వెంకట్ పెట్టిన పేరే వెంకీ మామ. త్వరలోనే లాంచ్ కానున్న ఈ సినిమాలో వెంకీ సరసన బాలీవుడ్ నటి హుమా ఖురేషీని హీరోయిన్‌గా తీసుకుంటున్నట్టు టాలీవుడ్ టాక్.
వెంకీ-చైతూ ఇద్దరూ కలిసి నటించడం ఇదేం మొదటిసారి కాదు. చైతూ నటించిన ప్రేమమ్ సినిమాలో వెంకీ సరిగ్గా ఇలాగే మామ పాత్రలో గెస్ట్ అప్పీయరెన్స్ ఇచ్చిన సంగతి తెలిసిందే. కాకపోతే ఇలా పూర్తిస్థాయిలో ఇద్దరు కలిసి సినిమా చేయడం మాత్రం ఇదే మొదటిసారి కావడంతో ఈ సినిమాకు లాంచ్ అవడానికన్నా ముందుగానే అభిమానుల్లో అంచనాలు ఏర్పడుతున్నాయి.
