తెలుగులో వరుస హిట్స్‌తో ఫుల్ జోష్‌మీదున్న విజయ్ దేవరకొండ త్వరలోనే బాలీవుడ్ ఆడియెన్స్‌కి సైతం పరిచయం కానున్నాడని తెలుస్తోంది. టాలీవుడ్ అగ్ర నిర్మాతల్లో ఒకరైన అశ్వనీదత్ నటుడు విజయ్ దేవరకొండతో ఓ సినిమా ప్లాన్ చేస్తున్నట్టు ఇటీవలే వార్తలొచ్చిన సంగతి తెలిసిందే. అయితే, ఈ సినిమా కేవలం తెలుగులోనే కాకుండా తెలుగు, తమిళ, హిందీ భాషల్లో తెరకెక్కించాలని ప్లాన్ చేస్తున్నట్టు సమాచారం. బాలీవుడ్ లో పేరున్న దర్శక ద్వయం రాజ్ నిడమనూరు, కృష్ణ డీకేల దర్శకత్వంలో ఈ సినిమా తెరకెక్కనున్నట్టు ఫిలింనగర్ వర్గాలు చెప్పుకుంటున్నాయి. 99, షోర్ ఇన్ ది సిటీ, గో గోవా గాన్, డీ ఫర్ దోపిడీ, హ్యాపీ ఎండింగ్, ఏ జెంటిల్‌మేన్ వంటి సినిమాలతోపాటు ప్రస్తుతం థియేటర్లలో ఉన్న హిందీ సినిమా 'స్త్రీ' ఈ దర్శకులు తెరకెక్కించిందే.
