રૂમમાં AC અને ફ્રિજ જોઈએ તો 60 હજાર ફી વધારે આપો, દાદાગીરી બાદ ઝૂકી ગુજરાતની કોલેજ

Gandhinagar News અમદાવાદ : ગાંધીનગર GMERS મેડિકલ કોલેજ માં વિદ્યાર્થીઓ પાસે વધારાના નાણાં વસૂલવાનો મામલે હોબાળો થયા બાદ આખરે મેડિકલ કોલેજ દ્વારા નિર્ણય પરત ખેંચાયો છે. વિદ્યાર્થીઓ દ્વારા એસી-ફ્રિજના ઉપયોગ પર વધારાના 60 હજાર વસુલવા સંદર્ભે બે દિવસ પહેલા નિર્ણય લેવાયો હતો, પરંતું શુક્રવારે સાંજે નિર્ણય પરત ખેંચી લેવાયો છે. જેને ગર્લ્સ અને બોય્ઝ બંને હોસ્ટેલમાં લાગુ કરાયો હતો. આખરે ડીન દ્વારા નિર્ણય ખેંચાયાની જાહેરાત કરાઈ છે. 

ગાંધીનગર ખાતે આવેલી જીએમઇઆરએસ મેડિકલ કોલેજમાં અભ્યાસ કરતાં વિદ્યાર્થીઓ પૈકી બોયઝ હોસ્ટેલ, ગર્લ્સ હોસ્ટેલ, પી.જી. હોસ્ટેલમાં રહેતા વિદ્યાર્થીઓના માથે એક નવો ફી વધારો ઝીંકાયો હતો. બે દિવસ પહેલા અચાનક જાહેરાત કરાઈ હતી કે, જે વિદ્યાર્થીઓ પોતાની રીતે રૂમમાં ઇલેક્ટ્રિક ઉપકરણોનો ઉપયોગ કરે છે, તેમની પાસેથી આગામી 1લી જૂનથી આ પ્રકારના ઉપકરણોના ઉપયોગ બદલ કેટલી રકમ વસુલ કરવામાં આવશે. આ સાથે જ કયા ઉપકરણના કેટલા ચાર્જ વસૂલાશે તેનું પણ લિસ્ટ જાહેર કરાયું હતું.

ઉપકરણ	ચાર્જ (માસિક)	વાર્ષિક
એસી	5000	60000
ફ્રિજ	1000	1200
એરકુલર	1000	12000
વધારાનો પંખો	500	6000
ઈન્ડક્શન સ્ટવ	1500	18000
વોટરહીટર	500	6000
રૂમ હીટર	2000	20000

સુવિધા વગર હોસ્ટેલમાં રહેવા મજબૂર વિદ્યાર્થીઓ
રાજ્યમાં હાલમાં કાળજાળ ગરમી પડી રહી છે ત્યારે જીએમઇઆરએસ મેડિકલ કોલેજ,ગાંધીનગરમાં અભ્યાસ કરતાં વિદ્યાર્થીઓ પૈકી જેઓ હોસ્ટેલમાં રહેતા હોય છે તેમને એસી, ફ્રીઝ, કુલર, સ્ટવ સહિતની કોઇપણ પ્રકારની સુવિદ્યાઓ આપવામાં આવતી નથી. જેના કારણે વિદ્યાર્થીઓ પોતાની રીતે આ પ્રકારની ઇલેકટ્રિક ઉપકરણો વસાવીને ઉપયોગ કરતાં હોય છે. વિદ્યાર્થીઓ પોતાના ખર્ચે હોસ્ટેલમાં આ પ્રકારની ચીજવસ્તુઓનો ઉપયોગ કરે છે તેવું કોલેજ સત્તાધીશોના ધ્યાનમાં આવતાં દરેક વસ્તુના ઉપયોગ પેટે ચાર્જ વસૂલવાનો આદેશ કરવામાં આવ્યો હતો. કોલેજના ડીન દ્વારા કરાયેલા પરિપત્ર પ્રમાણે જે વિદ્યાર્થીઓ આ પ્રકારના સાધનનો ઉપયોગ કરે છે તેઓએ આગામી 1લી જૂનથી નિર્ધારિત કરેલી ફી ભરવાની રહેશે.

વિરોધ બાદ નિર્ણય પરત ખેંચાયો
મેડિકલ કોલેજ દ્વારા અચાનક આ રીતે ગર્લ્સ હોસ્ટેલ, બોયઝ હોસ્ટેલમાં વધારાના નાણાં વસૂલવા બાબતે આદેશ કરતા હોબાળો થયો હતો. વિદ્યાર્થીઓ અને વાલીઓ દ્વારા તેનો વિરોધ કરાયો હતો. જેના બાદ અચાનક ફી વધારાનો નિર્ણય પરત ખેંચી લેવાયો છે. મેડિકલ કોલેજના ડીને ટેલિફોનિક ચર્ચામાં નિર્ણય પરત લેવાયો હોવાની માહિતી આપી હતી. 

ભૂતકાળમાં પણ ફી વધારીને પરત ખેંચી હતી
ઉલ્લેખનીય છે કે, ભૂતકાળમાં પણ રાજ્ય સરકાર હસ્તક મેડિકલ કોલેજોમાં આ રીતે ફી વધારાનો રાજ્ય સરકાર દ્વારા પ્રયાસ કરાયો હતો. ગત વર્ષે રાજ્યની 13 GMERS મેડિકલ કોલેજમાં ફી વધારાની જાહેરાત કરી હતી. જેના ભારે વિરોધ બાદ ફી વધારાનો નિર્ણય પરત ખેંચી લેવાયો હતો. ત્યારે હવે લાગે છે કે, સરકાર ધીમા પગલે ફરી ફી વધારો લાગુ કરવાના મૂડમાં છે. ધીમે પગલે એક કોલેજ બાદ બીજી કોલેજમાં આ પ્રકારે નિર્ણયો લેવાય તો નવાઈ નહિ.