કચ્છની જેલમાં બુટલેગરોની દારૂ પાર્ટી, નીતા ચૌધરી સાથે ઝડપાયેલો યુવરાજ જેલમાં કરતો હતો જલસા

Kutch News રાજેન્દ્ર ઠક્કર/કચ્છ : પૂર્વ કચ્છ પોલીસે ગળપાદર જેલમા સરપ્રાઈઝ ચેકિંગ દરમિયાન છ કેદીઓને કેફી પદાર્થ પીધેલી હાલતમાં ઝડપી લીધા હતા. આ કામગીરી દરમિયાન મોબાઈલ ફોન, રોકડા રૂપિયા અને એક દારૂની બોટલ પણ મળી આવી હતી. ચોંકાવનારી બાબત એ છે કે, તાજેતમરમાં કોન્સ્ટેબલ નીતા ચૌધરી સાથે પકડાયેલ યુવરાજસિંહ જાડેજા પણ જેલમાં દારૂ પીતો પકડાયો છે. આ સાથે જ 5 જેલ કર્મીઓને સસ્પેન્ડ કરવામાં આવ્યા છે.  

પૂર્વ કચ્છ પોલીસ વિભાગ દ્વારા ગળપાદર જિલ્લા જેલ ખાતે સરપ્રાઈઝ ચેકીંગ હાથ ધરાયું હતું. અલગ-અલગ ટીમો દ્વારા બેરેકમા કેદીઓની ઝડતી કરવામાં આવતા કેફી પદાર્થ પીધેલી હાલતમાં છ કેદીઓ મળી આવ્યા હતા. તેમજ મોબાઇલ અને દારૂની બોટલ અને ઉપરથી રોકડા રૂપિયા 50 હજાર મળી આવ્યા હતા. 

ગળપાદર જીલ્લા જેલ ખાતે રાત્રી દરમ્યાન સરપ્રાઇઝ ઝડતી-તપાસ ચેકીંગ હાથ ધરી ગેરકાયદે મોબાઇલ ફોન, રોકડ રકમ તેમજ પ્રોહીબીશન એક્ટ તળે ગુનો રજીસ્ટર કરી કેદીઓ વિરૂધ્ધ કાયદેસરની પૂર્વ કચ્છ જીલ્લા પોલીસ દ્વારા કાર્યવાહી હાથ ધરી હતી. 

આ કામગીરીમા પૂર્વ કચ્છ પોલીસ અધિક્ષક, સાગર બાગમાર, પૂર્વ-કચ્છ, ગાંધીધામની આગેવાનીમાં એલ.સી.બી., એસ.ઓ.જી, ગાંધીધામ એ ડીવીઝન, ગાંધીધામ બી ડીવીઝન, આદીપુર પોલીસ સ્ટેશનના અધિકારી તથા કર્મચારીઓની અલગ-અલગ ટીમો બનાવી ગળપાદર જિલ્લા જેલ ખાતે રાત્રી દરમ્યાન અલગ-અલગ બેરેકો વાઇજ સરપ્રાઇઝ ઝડતી-તપાસ ચેકીંગ હાથ ધરી હતી. તમામ બેરેકની તપાસ કરાઈ હતી. જેમાં એક બેરેકમાં આરોપીઓ કેફીપીણું પીધેલ હાલતમાં ઝડપાયા હતા. તેમજ મોબાઇલ ફોનનો ઉપયોગ કરતાં મળી આવ્યા હતા. આ ઉપરાંત આરોપીઓ પાસેથી 50 હજાર રૂપિયાની રોકડ રકમ પણ મળી આવી હતી. તમામ મુદ્દામાલ કબજે લઇ આરોપીઓ વિરૂધ્ધ ધોરણસર કાર્યવાહી કરવામાં આવી છે.

આ કાર્યવાહીમાં જેલના કેદીઓ મનોજ ઉર્ફે પકાડો કાનજીભાઈ માતંગ, રોહિત ગોવિંદભાઈ ગરવા, શિવભદ્રસિંહ સુખદેવસિંહ જાડેજા, ગોવિંદભાઈ હરજીભાઈ મહેશ્વરી, યુવરાજસિંહ રાજેન્દ્રસિંહ જાડેજા, રોહિતસંગ ઉર્ફે સોનુ રામપ્રસાદસંગ ઠાકુર નામના આરોપીઓ પકડાયા હતા. તમામ છ કેદીઓ વિરૂધ્ધ કેફી પીણું પીવા સબબ પ્રોહી કલમ-૬૬(૧)(બી) મુજબ અલગ-અલગ ગુન્હાઓ દાખલ કરાવવામાં આવી છે. તેમજ પ્રોહી. કબજામાં રાખવા સબબ પ્રોહી એક્ટ કલમ-૬૫(એ(એ) મુજબ ગુન્હો દાખલ કરાવવામાં આવ્યો છે.

ફરજ મોકૂફ કરાયેલા જેલ કર્મીઓ 

• એલ. વી પરમાર જેલર ગ્રુપ ૨ ઇચા, અધિક્ષક 
• આર એસ દેવડા, સુબેદાર 
• પીન્કેશ સી પટેલ, હવાલદાર
• રવીન્દ્ર મુળિયા, સિપાઈ 
• શૈલશ ખેતરીયા, સિપાઈ  

જ્યારે સરપ્રાઈઝ ચેકીંગ દરમિયાન યુવરાજસિંહ રાજેન્દ્રસિંહ જાડેજા, સુરજીત દેવીસિંગ પરદેશી, રજાક ઉર્ફે સોપારી દાઉદભાઈ ચાવડા, હીતેન્દ્રસિંહ ઉર્ફે હીતુભા કરણસિંહ ઝાલા પાસેથી મોબાઈલ ફોન મળી આવ્યા હતા. આ ચારેય કેદીઓ વિરૂધ્ધ પ્રિઝનર એક્ટ કલમ- ૪૨, ૪૩, ૪૫ મુજબ અલગ અલગ ગુનાઓ દાખલ કરાવવામાં આવ્યા છે.

આ ઉપરાંત જેલની હાઇ સિક્યુરીટી બેરેકની છત ઉપરથી ૫૦૦ના દરની નોટ નંગ-૧૦૦, કુલ્લે રૂ.૫૦,૦૦૦ તથા ચાર્જર નંગ-૧ કિંમત રૂપિયા. ૧૦૦ મળી આવી હતી. 

આ કાર્યવાહી દરમિયાન પોલીસે એક પ્લાસ્ટિકની પાણીની બોટલ, ભારતીય બનાવટનો વિદેશી દારૂની બોટલ, કાળા કલરનો એપ્પલ કંપનીનો આઇફોન નંગ-૦૧, કિમત રૂપિયા ૧૦,૦૦૦, સેમસંગ કંપનીનો એન્ડ્રોઈડ ગેલેક્સી A05 મોબાઈલ ફોન નંગ-૦૧, કિમત રૂપિયા ૫,૦૦૦, એપ્પલ કંમ્પનીનો 15 Pro MAX મોડેલનો આઇફોન નંગ-૦૧, કિમત રૂપિયા. ૭૫,૦૦૦, સેમસંગ કંમ્પનીનો સાદો કીપેડ વાળો મોબાઇલ ફોન નંગ-૦૧, કિમત . રૂપિયા ૫૦૦ રોકડા રૂપિયા-૫૦,૦૦૦ મળી કુલ્લે કિંમત રૂપિયા ૧.૪૦,૭૦૦નો મુદામાલ કબ્જે કર્યો હતો. 

આ કાર્યવાહી બાદ પ્રોહીબીશન તળે કુલ 7 કેસ રજીસ્ટર કરવામાં આવ્યા છે. જે પૈકી દારૂ પીધેલાના કેસો-૦૬ તથા વિદેશી દારૂ કબજાનો કેસ-૦૧ રજીસ્ટર કરાયા છે. તેમજ જેલની અંદર ગેર કાયદેસર મોબાઇલ ફોનના ઉપયોગ બદલ તેમજ રોકડ રકમ મળી આવેલ તે બાબતે અલગથી ગુન્હો રજીસ્ટર કરાયો છે.