સૌરાષ્ટ્રમાં મેઘમહેર: ગોંડલ અને ભાવનગરમાં 1-1 ઇંચ વરસાદ, જૂનાગઢના તરસિગડામાં બળદગાડુ તણાયું

ભાવનગર : ભારે પવન અને વીજળીના કડાકા સાતે મોડી રાત્રે ભાવનગરમાં 1-1 ઇંચ અને ગોંડલમાં પણ 1 ઇંચ વરસાદ પડ્યો હતો. ભારે પવન અને વરસાદનાં કારણે અનેક વૃક્ષો ધરાશાયી થયા હતા. જેને લઇને વહેલી સવારે ટ્રાફિકજામ થયો હતો. બીજી તરફ જૂનાગઢનાં તરસિગડામાં ધોધમારધોધમાર વરસાદનાં પગલે એક બળદગાડુ પાણીમાં તણાયું હતું. બળદગાડામાં રહેલ એક પુરૂષ અને મહિલા પાણીમાં તણાયા હતા. જો કે પુરૂષને તરતા આવડતું હોવાનાં કારણે ખેડૂત પોતે કિનારે નિકળી ગયો હતો. જો કે મહિલાનું મોત નિપજ્યું હતું.

અમરેલીનાં લાઠીમાં ગાગડીયા નદીમાં નવા નિરની આવક થઇ હતી. ગત મોડી રાત્રે ધોધમાર વરસાદ પડતા ગાગડીયા  નદી બેકાંઠે થઇ હતી.  ભાદાણી ચેકડેમ છલકાઇ ગઇ હતી. ચેકડેમમાં નવા નીરની આવક થતા ખેડૂતોનાં ખુશીનો માહોલ જોવા મળ્યો હતો. આ ઉપરાંત નાના ચેક ડેમ પણ છલકાઇ ગયા હતા. 

ગોંડલ પંથકમાં પણ વરસાદના પગલે અનેક ગામડાઓમાં પાણી ભરાયા હતા. જ્યારે ભાવનગરમાં પણ રાત્રે ભારે પવન સાથે ધોધમાર વરસાદ થતા અનેક નિચાણવાળા વિસ્તારોમાં પાણી ભરાયા હતા. આ ઉપરાંત જિલ્લાનાં વલ્લભીપુર, મહુવા, તળાજા, પાલિતાણા, ગારિયાધાર, ઉમરાળા, ઘોઘા અને શિહોર પંથકમાં ભારે વરસાદ પડ્યો હતો. 

વરસાદને લઇને શિહોર સહિત અનેક તાલુકાઓમાં વીજ પુરવઠ્ઠો ખોરવાયો હતો. જ્યારે બોટાદ પંથકમાં ભારે પવન સાથે સામાન્ય વરસાદ પડ્યો હતો. બરવાળા અને ઢસામાં ભારે પવનનાં કારણે અનેક વૃક્ષો પણ પડ્યા હતા. જેના પગલે વહેલી સવારે ટ્રાફિકજામ થયો હતો.