French Open: જોકોવિચે કરિયરનું 19મું ગ્રાન્ડસ્લેમ ટાઇટલ જીત્યું, પાંચ સેટના સંઘર્ષ બાદ સિતસિપાસને હરાવ્યો

સર્બિયાના નંબર-1 ટેનિસ સ્ટાર નોવાક જોકોવિચે બીજીવાર ફ્રેન્ચ ઓપનનું ટાઇટલ જીતવાની સિદ્ધિ મેળવી છે. 

Updated By: Jun 13, 2021, 11:20 PM IST
French Open: જોકોવિચે કરિયરનું 19મું ગ્રાન્ડસ્લેમ ટાઇટલ જીત્યું, પાંચ સેટના સંઘર્ષ બાદ સિતસિપાસને હરાવ્યો
ફોટો સાભાર (@rolandgarros)

પેરિસઃ વિશ્વના નંબર વન ટેનિસ ખેલાડી નોવાક જોકોવિચે ફ્રેન્ચ ઓપન-2021નું ટાઇટલ કબજે કરી લીધું છે. જોકોવિચે ફાઇનલમાં સંઘર્ષપૂર્ણ મુકાબલામાં સ્ટેફાનોસ સિતસિપાસને 6-7(6), 2-6, 6-3, 6-2, 6-4 થી પરાજય આપ્યો હતો. જોકોવિચે પ્રથમ બે સેટ ગુમાવ્યા બાદ શાનદાર વાપસી કરતા બીજીવખત ફ્રેન્ચ ઓપનનું ટાઇટલ કબજે કર્યું છે. ઓવરઓલ જોકોવિચના નામે આ 19મું ગ્રાન્ડસ્લેમ ટાઇટલ છે. તે ફેડરર અને નડાલ કરતા એક ગ્રાન્ડસ્લેમ ટાઇટલ પાછળ છે. મહત્વનું છે કે સેમીફાઇનલમાં જોકોવિચે રાફેલ નડાલને હરાવ્યો હતો. 

જોકોવિચે સિતસિપાસને પાંચ સેટ સુધી ચાલેલા લાંબા મુકાબલામાં 6-7, 2-6, 6-3, 6-2, 6-4 થી પરાજય આપ્યો હતો. સિતસિપાસે ફાઇનલ મુકાબલામાં જોકોવિચને શાનદાર ટક્કર આપી અને અંતિમ ક્ષણ સુધી મેચ રોમાંચક બનાવી રાખી હતી. સિતસિપાસ મેચની શરૂઆતમાં જોકોવિચ પર ભારે પડ્યો અને પ્રથમ બે સેટ પોતાના નામે કરી લીધા હતા. પરંતુ ત્યારબાદ નંબર વન ખેલાડીએ શાનદાર વાપસી કરતા ટ્રોફી કબજે કરી છે. તે હવે ફેડરર અને નડાલની બરોબરી કરવાથી માત્ર એક ગ્રાન્ડસ્લેમ ટાઇટલ દૂર છે. 

જોકોવિચ છેલ્લા 52 વર્ષોમાં ચારેય ગ્રાન્ડસ્લેમને બે વખત જીતનાર એકમાત્ર ખેલાડી છે. જોકોવિચે સેમીફઇનલમાં ક્લે કોર્ટના બાદશાહ કહેવાતા નડાલને બહારનો રસ્તો દેખાડી દીધો હતો. જોકોવિડે નડાલને  3-6, 6-3, 7-6 (4), 6-2 થી હરાવ્યો હતો. ફેડરરે ઈજાને કારણે અધવચ્ચે ટૂર્નામેન્ટમાંથી ખસી જવાનો નિર્ણય કર્યો હતો. 

લેટેસ્ટ ન્યૂઝથી અપડેટ રહેવા માટે અમારી Zee News App ડાઉનલોડ કરો, અમારી સાથે જોડાઓ : facebook | twitter | youtube