‘NATO પ્લસ’નું સભ્ય બને ભારત! અમેરિકી સંસદીય સમિતિની ભલામણ, ચીનને રોકવું છે ભારતને મદદ કરો

વોશિંગટનઃ વડા પ્રધાન નરેન્દ્ર મોદીની યુએસ મુલાકાત પહેલાં કોંગ્રેસની એક શક્તિશાળી સમિતિએ નાટો (નોર્થ એટલાન્ટિક ટ્રીટી ઓર્ગેનાઈઝેશન) પ્લસમાં (NATO Plus) ભારતનો સમાવેશ કરવાની ભલામણ કરી છે. નાટો પ્લસ (NATO Plus 5) એ એક સુરક્ષા વ્યવસ્થા છે જે વૈશ્વિક સંરક્ષણ સહયોગ વધારવા માટે નાટો અને પાંચ સહયોગી દેશો ઓસ્ટ્રેલિયા, ન્યુઝીલેન્ડ, જાપાન, ઇઝરાયેલ અને દક્ષિણ કોરિયાને સાથે લાવે છે.

આમાં ભારતનો સમાવેશ કરીને ગુપ્ત માહિતી આ દેશો વચ્ચે એકીકૃત રીતે વહેંચવામાં આવશે અને ભારતને કોઈપણ સમયના વિલંબ વિના આધુનિક સૈન્ય તકનીકના ઍક્સેસ મળશે. યુએસ અને ચાઈનીઝ કમ્યુનિસ્ટ પાર્ટી (CCP) વચ્ચે વ્યૂહાત્મક સ્પર્ધા અંગેની હાઉસ સિલેક્ટ કમિટીએ તાઈવાનની પ્રતિરોધ ક્ષમતા વધારવા માટે એક નીતિ ઠરાવ પસાર કર્યો હતો, જેમાં ભારતનો સમાવેશ કરીને નાટો પ્લસને મજબૂત બનાવવાનો સમાવેશ થાય છે. સમિતિના અધ્યક્ષ માઈક ગલાઘર અને રેન્કિંગ સભ્ય રાજા કૃષ્ણમૂર્તિ હતા.

આ પણ વાંચો- ઈમરાન ખાનના મેડિકલ રિપોર્ટથી ચોંકાવનારો ખુલાસો! પાકિસ્તાનની જનતાની આંખો થઈ પહોળી

કમ્યુનિસ્ટ પાર્ટી ઓફ ચાઈનાની સાથે વ્યૂહાત્મક સ્પર્ધા જીતવા અને તાઈવાનની સુરક્ષા સુનિશ્ચિત કરવા માટે, યુ.એસ.ને ભારત સહિત અમારા સહયોગીઓ અને સુરક્ષા ભાગીદારો સાથે સંબંધો મજબૂત કરવાની જરૂર છે, એમ પસંદગી સમિતિએ જણાવ્યું હતું. નાટો પ્લસમાં ભારતનો સમાવેશ ભારત-પેસિફિક ક્ષેત્રમાં CCP આક્રમણને રોકવા અને વૈશ્વિક સુરક્ષાને મજબૂત કરવા માટે યુએસ અને ભારત વચ્ચેની ગાઢ ભાગીદારીને વધારશે.

છેલ્લા છ વર્ષથી આ પ્રસ્તાવ પર કામ કરી રહેલા ભારતીય-અમેરિકન રમેશ કપૂરે કહ્યું કે આ એક મહત્વપૂર્ણ ઘટનાક્રમ છે. તેમણે આશા વ્યક્ત કરી હતી કે આ ભલામણને નેશનલ ડિફેન્સ ઓથોરાઇઝેશન એક્ટ 2024માં સ્થાન મળશે અને આખરે તે કાયદો બની જશે. ઉલ્લેખનીય છે કે, વડાપ્રધાન મોદી આવતા મહિને અમેરિકાની રાજકીય મુલાકાતે જશે.