நிபா வைரஸ்: குறைவாக தொற்றும், அதிக உயிரை எடுக்கும் பங்களாதேஷ் மாறுபாடு

கேரளாவில் நிபா வைரஸ் பரவுவதைத் தடுக்கவும், அதைக் கட்டுப்படுத்தவும் கேரள அரசு தீவிர நடவடிக்கைகளை மேற்கொண்டு வருகிறது. அங்கு பரவும் பங்களாதேஷ் நிபா வைரஸ் வேரியண்ட் அறிகுறிகளே காட்டாமல் உயிரைக் கொல்லுமாம்.

கேரளாவில் நிபா வைரஸ்

கேரளாவில் நிபா வைரஸ் பரவல் பொதுமக்கள் மத்தியில் பீதியை ஏற்படுத்தியுள்ளது. இதனை  அதிகாரப்பூர்வமாக அறிவித்திருக்கும் அம்மாநில அரசு, துரிதமான முன்னெச்சரிக்கை நடவடிக்கைகளை எடுத்திருக்கிறது. மாநிலம் முழுவதும் சுகாதாரத்துறையின் செயல்பாடுகள் முடுக்கிவிடப்பட்டுள்ளன. அண்டை மாநிலமான தமிழ்நாட்டிலும் கேரளாவை ஒட்டியிருக்கும் எல்லைப் பகுதிகளில் முன்னெச்சரிக்கை சோதனை மையங்கள் அமைக்கப்பட்டு, கண்காணிப்பு பணிகள் தீவிரப்படுத்தப்பட்டுள்ளன.

நிபா வைரஸ்: வங்கதேச மாறுபாடு

கேரளாவில் பரவும் நிபா வைரஸ், வங்கதேச மாறுபாடு என கேரள மாநில அரசு அதிகாரப்பூர்வமாக அறிவித்திருக்கிறது. அம்மாநில சுகாதாரத்துறை அமைச்சர் வீனா ஜார்ஜ் கூறுகையில், இந்த மாறுபாடு தொற்று குறைவாக இருக்கும், ஆனால் அதிக இறப்பு விகிதத்தைக் கொண்டுள்ளது என தெரிவித்திருக்கிறார். இதுவரை இந்த வைரஸால் பாதிக்கப்பட்ட நான்கு பேரில் 2 பேர் உயிரிழந்துள்ளதாகவும் அறிவிக்கப்பட்டுள்ளது.  

4வது முறையாக கேரளாவில் பரவும் நிபா வைரஸ்

கேரளாவில் நிபா வைரஸ் பரவுவது இது நான்காவது முறையாகும். 2018 ஆம் ஆண்டு முதலில் நிபா வைரஸ் பரவியபோது பாதிக்கப்பட்ட 23 பேரில் 21 பேர் இறந்தனர். 2019 மற்றும் 2021 ஆம் ஆண்டில், நிபா வைரஸால் பாதிக்கப்பட்ட மேலும் இரண்டு பேர் உயிரிழந்தனர். 

நிபா வைரஸ் வரலாறு

நிபா வைரஸுக்கு எதிராக சிகிச்சைகள் அல்லது தடுப்பூசிகள் எதுவும் இல்லை. இந்த வைரஸால்  பாதிக்கப்பட்ட வெளவால்கள், பன்றிகள் அல்லது பிற நபர்களின் உடல் திரவங்களுடன் நேரடி தொடர்பு மூலம் இந்த வைரஸ் மனிதர்களுக்கு பரவுகிறது. இது முதன்முதலில் 1999 ஆம் ஆண்டில் மலேசியா மற்றும் சிங்கப்பூரில் பன்றி வளர்ப்பவர்கள் மற்றும் பன்றிகளுடன் நெருங்கிய தொடர்பில் இருந்த மற்றவர்களைப் பாதிக்கும் நோய்களின் போது கண்டறியப்பட்டது.

கேரளாவில் நிபா வைரஸ்: லேட்டஸ்ட் அப்டேட்ஸ் 

- கோழிக்கோடு மருத்துவக் கல்லூரியில் நிபா வைரஸைப் பரிசோதிக்கவும், வௌவால்களின் கணக்கெடுப்புக்காகவும் மொபைல் ஆய்வகத்தை அமைப்பதற்காக புனேவின் தேசிய வைராலஜி இன்ஸ்டிட்யூட் (என்ஐவி) குழுக்கள் கேரளாவுக்கு வந்துள்ளன.
- சென்னையில் இருந்து தொற்றுநோயியல் நிபுணர்கள் குழுவும் கேரளாவுக்கு சென்று ஆய்வு நடத்தவுள்ளது.
- கேரளா சுகாதார அமைச்சர் ஜார்ஜ் சுகாதார நெருக்கடியைத் தீர்க்க செயல்படுத்தப்படும் தொடர் நடவடிக்கைகளை அறிவித்தார் - கண்காணிப்பு, தொடர்புத் தடமறிதல், தனிநபர்களை குறைந்த மற்றும் அதிக ஆபத்துள்ள குழுக்களாக வகைப்படுத்துதல், தனிமைப்படுத்தும் வசதிகளை நிறுவுதல், கட்டுப்பாட்டு மண்டலங்களைக் குறித்தல் மற்றும் இந்திய கவுன்சிலில் இருந்து மருந்துகளை வாங்குதல். பாதிக்கப்பட்டவர்களுக்கான ICMR மூலம் சிகிச்சை வழங்க ஏற்பாடு.
- கோழிக்கோடு நிர்வாகம், ஆத்தஞ்சேரி, மருதோங்கரா, திருவள்ளூர், குட்டியாடி, காயக்கொடி, வில்லியப்பள்ளி மற்றும் கவிழும்பாறை ஆகிய ஏழு கிராம பஞ்சாயத்துகளை கட்டுப்பாட்டு மண்டலங்களாக அறிவித்துள்ளது.
- கேரளாவின் கண்ணூர், வயநாடு மற்றும் மலப்புரம் மாவட்டங்களுக்கும் எச்சரிக்கை விடுக்கப்பட்டுள்ளது.
- இந்திய மருத்துவ ஆராய்ச்சி கவுன்சிலும் (ICMR) வைரஸ் நோயாளிகளுக்கு சிகிச்சை அளிக்க தேவையான மோனோக்ளோனல் ஆன்டிபாடிகளை அனுப்ப ஒப்புக் கொண்டுள்ளது.
- கட்டுப்பாட்டு பகுதிகளில் உள்ள மக்கள் முகக் கவசம் அணியவும், சானிடைசர்களை பயன்படுத்தவும், சமூக இடைவெளியை கடைபிடிக்கவும் கேட்டுக் கொள்ளப்பட்டுள்ளனர்.
- கோழிக்கோடு மாவட்ட ஆட்சியர் கீதா செவ்வாய்க்கிழமை தனது முகநூல் பதிவில், மறு அறிவிப்பு வரும் வரை, காவல்துறையால் சீல் வைக்கப்பட்டுள்ள பகுதிகளுக்குள் யாரும் செல்லவோ, வெளியே செல்லவோ அனுமதி இல்லை என தெரிவத்துள்ளார்.
- அத்தியாவசிய மற்றும் மருத்துவப் பொருட்களை விற்பனை செய்யும் கடைகள் கட்டுப்பாட்டு மண்டலங்களுக்குள் காலை 7 மணி முதல் மாலை 5 மணி வரை செயல்பட அனுமதிக்கப்படுகிறது. இருப்பினும், மருந்தகங்கள் மற்றும் சுகாதார மையங்கள் செயல்படுவதில் நேரக்கட்டுப்பாடுகள் இல்லை.
- உள்ளாட்சி அமைப்புகள் மற்றும் கிராம அலுவலகங்கள் குறைந்தபட்ச பணியாளர்களுடன் செயல்படும். இருப்பினும், கட்டுப்பாட்டு மண்டலங்களுக்குள் வங்கிகள், பிற அரசு நிறுவனங்கள், கல்வி நிறுவனங்கள் மற்றும் அங்கன்வாடிகள் செயல்படாது. ஆன்லைன் சேவைகளைப் பயன்படுத்தவும், வீட்டை விட்டு வெளியேறுவதைத் தவிர்க்கவும் மாவட்ட ஆட்சியர் மக்களுக்கு அறிவுறுத்தினார்.
- தேசிய நெடுஞ்சாலைகளில் செல்லும் வாகனங்கள் மற்றும் கட்டுப்பாட்டு பகுதிகள் வழியாக செல்லும் வாகனங்கள் இந்த பகுதிகளில் நிற்க வேண்டாம் என்றும் கேட்டுக் கொள்ளப்பட்டுள்ளது.

சார்பில்லாத சமரசமில்லாத செய்திகள் உங்கள் உள்ளங்கைகளில்! 

உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்.

முகநூலில் @ZEETamilNews, ட்விட்டரில் @ZeeTamilNews மற்றும் டெலிக்ராமில் https://t.me/ZeeTamilNews என்ற பக்கத்தை லைக் செய்யவும்.

கல்வி, பொழுதுபோக்கு, அரசியல், விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!

Android Link: https://bit.ly/3AIMb22

Apple Link: https://apple.co/3yEataJ