LIC Policy Claim: పాలసీదారుడి మరణం తరువాత..నామినీ ఆ పాలసీ ఎలా క్లెయిమ్ చేసుకోవాలి

LIC Policy Claim: దేశంలో అతిపెద్ద ఇన్సూరెన్స్ సంస్థ ఎల్ఐసీ. ఇన్సూరెన్స్ అంటే ముందుగా గుర్తొచ్చేది ఎల్ఐసీనే. పాలసీదారుడు హఠాత్తుగా మరణిస్తే..ఆ పాలసీ ఎలా క్లెయిమ్ చేయాలి, క్లెయిమ్ చేసేందుకు ఏం అవసరమౌతాయనే విషయాలు తెలుసుకుందాం..

లైఫ్ ఇన్సూరెన్స్ కార్పొరేషన్ ఆఫ్ ఇండియా..సింపుల్‌గా చెప్పాలంటే ఎల్ఐసీ. ఇటీవల ఐపీవో సైతం విడుదలైంది. ప్రపంచంలోనే రెండవ అతిపెద్ద ఇన్సూరెన్స్ సంస్థగా పరిగణిస్తారు. ఇండియాలో ప్రతి పదిమందిలో ఇద్దరికైనా ఎల్ఐసీ పాలసీ ఉంటుందనేది ఓ అంచనా. అంతగా నమ్మకాన్ని సంపాదించుకుంది ఎల్ఐసీ. ముఖ్యంగా మథ్య తరగతి కుటుంబాల్లో కచ్చితంగా ఎల్ఐసీ పాలసీ ఉంటుంది. ప్రతి పల్లెపల్లెకు విస్తరించిన సంస్థ ఇది.  

అయితే ఎల్ఐసీ పాలసీ క్లెయిమ్ విషయంలో చాలామందికి పూర్తి వివరాలు తెలియవు. ఆర్ధిక కారణాలతో ఎల్ఐసీ పాలసీ మధ్యలో నిలిచిపోతే ఏం చేయాలి, పాలసీదారుడు మరణిస్తే క్లెయిమ్ ఎలా చేయాలనే ముఖ్యమైన విషయాలు తెలుసుకోవడం చాలా అవసరం. ఎందుకంటే కొంతమంది పాలసీలను కొనసాగిస్తుుంటారు. ఇంకొంతమంది మధ్యలో ఆపేస్తుంటారు. ఇంకొన్ని పాలసీలు పాలసీదారుడి అకాల మరణంతో నిలిచిపోతుంటాయి. ఈ నేపధ్యంలో పాలసీదారుడు మరణిస్తే.. సంబంధిత నామినీ ఆ పాలసీను ఎలా క్లెయిమ్ చేసుకోవాలనే విషయంలో ఎల్ఐసీ కొన్ని సూచనలు ఇస్తోంది. అవేంటో చూద్దాం.

పాలసీ తీసుకున్న వ్యక్తి ఒకవేళ చనిపోతే..నామినీ లేదా కుటుంబసభ్యులు సంబంధిత పాలసీను క్లెయిమ్ చేసుకోవల్సి ఉంటుంది. ఇన్సూరెన్స్ క్లెయిమ్ ఎలా చేసుకోవాలనేది ఇప్పుడు  తెలుసుకుందాం. డెత్ క్లెయిమ్ ఫైల్ చేసే ప్రక్రియను ప్రతి ఒక్కరూ తెలుసుకోవడం మంచిది. డెత్ క్లెయిమ్ ప్రక్రియ పూర్తిగా ఆఫ్‌లైన్‌లో ఉంటుంది. పాలసీ తీసుకున్న హోమ్ బ్రాంచ్‌ను సంప్రదించాలి. ఆ శాఖకు వెళ్లేముందు అవసరమైన అన్ని పత్రాల్ని తీసుకెళ్లాలి. డెత్ క్లెయిమ్ ఫారమ్‌ను సమర్పించే ముందు పాలసీ చేసిన ఏజెంట్ లేదా డెవలప్‌మెంట్ ఆఫీసర్ సంతకం తప్పనిసరి. 

ఎలా క్లెయిమ్ చేయాలి

డెత్ క్లెయిమ్ ప్రక్రియ ప్రారంభించేందుకు ముందుగా ఎల్ఐసీ హోమ్ బ్రాంచ్‌ను సంప్రదించాలి. పాలసీదారుడి మరణం గురించి చెప్పాలి. నామినీ బ్యాంకు ఖాతాలో నిధుల బదిలీ నిమిత్తం ఫారం 3783, ఫారం 3801, ఎన్ఈఎఫ్‌టీ ఫారమ్‌లు తీసుకోవాలి. ఈ ఫారమ్‌లను ఫిల్ చేసి..ఒరిజినల్ డెత్ సర్టిఫికేట్, ఒరిజినల్ పాలసీ బాండ్, నామినీ పాన్‌కార్డు, నామినీ ఆధార్ కార్డు, ఓటరు ఐడీ, డ్రైవింగ్ లైసెన్స్ లేదా పాస్‌పోర్ట్, మరణించిన పాలసీదారుడి ఐడీ, నామినీ డిక్లరేషన్ ఫారమ్ సమర్పించాలి. 

క్లెయిమ్‌ కోసం ఏ వివరాలు సమర్పించాలి

పాలసీదారుడు మరణించిన తేదీ, మరణించిన ప్రదేశం, మరణానికి కారణం గురించి చెప్పాల్సి ఉంటుంది. ఎన్ఈఎఫ్‌టీ ఫారంతో పాటు నామినీ బ్యాంకు ఖాతాదారుని పేరు, ఎక్కౌంట్ నెంబర్, ఐఎఫ్ఎస్‌సీ కోడ్ ఉన్న క్యాన్సెల్ చెక్ సమర్పించాలి. బ్యాంకు పాస్‌బుక్ ఫోటో కాపీ కూడా తప్పకుండా సబ్మిట్ చేయాలి. నామినీకు సంబంధించిన పాన్‌కార్డు, పాలసీదారుడి ఐడీ ప్రూఫ్, వెరిఫికేషన్ నిమిత్తం ఒరిజినల్ బ్యాంక్ పాస్‌బుక్ వంటివి తప్పకుండా తీసుకెళ్లాలి. 

డెత్ క్లెయిమ్ ప్రోసెసింగ్ డాక్యుమెంట్లు ఆమోదించే ముందు ఎల్ఐసీ అధికారి ఒరిజినల్ పాస్‌బుక్ కాపీతో వెరిఫికేషన్ ప్రక్రియ ఉంటుంది. మొత్తం నగదును నామినీ బ్యాంకు ఎక్కౌంట్‌లో బదిలీ చేసే ముందు ఎల్ఐసీ కొన్ని అదనపు డాక్యుమెంట్లను కోరే అవకాశముంది. డాక్యుమెంట్లు సమర్పించిన తరువాత నెల వ్యవధిలో నగదు మొత్తం బదిలీ అవుతుంది. 

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.