ఇటీవలే ఇరు కుటుంబాలతో కలిసి మాల్దీవులకి వెళ్లిన రణ్‌వీర్ సింగ్, దీపికా పదుకునే త్వరలోనే పెళ్లి చేసుకోబోతున్నారు అనే వార్తలు సోషల్ మీడియాను షేక్ చేశాయి. ఈ ప్రేమ జంట పెళ్లికి ఇంట్లోనూ అభ్యంతరాలు లేవని, ఆ రెండు కుటుంబాలు కలిసి మాల్దీవులకి వెళ్లడమే అందుకు సాక్ష్యం అని మీడియా సైతం కోడైకూసింది. ఇదిలావుండగానే తాజాగా ఈ ప్రేమ జంట గోవాలో ఓ ఖరీదైన బంగ్లా సైతం కొనుగోలు చేసినట్టు వార్తలొస్తున్నాయి. ఓ వైపు రణ్‌వీర్ సింగ్, దీపికా పదుకునె పెళ్లి చేసుకోబోతున్నారట అని మీడియాలో ఇన్ని కథనాలు వెలువడుతున్నా.. అదేమీ పట్టించుకోకుండా ఆ ఇద్దరూ కలిసి గోవాలో ఓ బంగ్లా సొంతం చేసుకున్నట్టు సమాచారం.
ముంబై మిర్రర్ ప్రచురించిన ఓ కథనం ప్రకారం గోవాలో వీళ్లిద్దరూ కలిసి కొనుక్కున్న బంగ్లా పక్కనే ఆర్బీఐ మాజీ గవర్నర్ రఘురాం రాజన్, ఇండియన్ ఫేమస్ క్రికెటర్ సునీల్ గవాస్కర్ లాంటి ప్రముఖుల బంగ్లాలు వున్నట్టు తెలుస్తోంది. అయితే, వాళ్లిద్దరి పెళ్లి వార్తని ఖండించినట్టుగానే ఈ బంగ్లా కొనుగోలు విషయాన్ని కూడా ఖండించాడు రణ్‌వీర్ సింగ్ మీడియా అధికార ప్రతినిధి. కానీ నిప్పు లేనిదే పొగ రాదు కదా.. ఇన్నిసార్లు వీళ్ల పెళ్లి గురించి వార్తలొస్తున్నాయంటే అందులో ఎంతో కొంత వాస్తవం వుండే వుంటుందంటున్నాయి మీడియా కథనాలు.
