బాలకృష్ణ తాజాగా నటిస్తున్న చిత్రం 'ఎన్టీఆర్'. స్వర్గీయ మాజీ ముఖ్యమంత్రి, సినీ నటుడు నందమూరి తారకరామారావు జీవిత కథ ఆధారంగా తెరకెక్కిస్తున్న ఈ బయోపిక్ చిత్రంలో.. ఎన్టీఆర్ పాత్రను తనయుడు బాలకృష్ణ పోషిస్తున్న సంగతి తెలిసిందే. బాలయ్య ప్రస్తుతం ఈ బయోపిక్ పనిలో బిజీగా ఉన్నాడు. రెగ్యులర్ షూటింగ్ జులైలో ప్రారంభం కానుంది. ఈ సినిమా పూర్తయిన తరువాత బాలయ్య బోయపాటి శ్రీను, వీవీ వినాయక్‌లతో సినిమా చేయనున్నారు.
బాలయ్య బోయపాటి శ్రీను కథకు ఓకే చెప్పారని.. ఇంకా వీవీ వినాయక్ కథకు ఓకే చెప్పలేదని తెలిసింది. వినాయక్ తెచ్చిన దాదాపు పది డిఫరెంట్ కథలను బాలయ్య తిరస్కరించారని ఇండస్ట్రీలో టాక్.
వినాయక్ బాలయ్యని ఒప్పించటానికి అకుల శివ నుండే కాకుండా ఇతర రచయితల నుండి స్క్రిప్ట్స్ కోసం చూస్తున్నాడు. బాలకృష్ణ నిరాకరించినప్పటికీ, ప్రస్తుతం వినాయక్ తగిన స్క్రిప్ట్ కోసం వేచి ఉన్నాడు. ఎన్టీఆర్ బయోపిక్ తర్వాత బోయపాటి శ్రీను చిత్రంలో బాలయ్య నటించనుండగా.. వినాయక్ ప్రాజెక్టు 2019 మధ్యలో పట్టాలెక్కనుందని సమాచారం.
ఎన్టీఆర్ బయోపిక్ చిత్రంలో నటించబోయే నటీనటుల విషయానికి వస్తే.. ఎన్టీఆర్ భార్య బసవతారకం పాత్రలో బాలీవుడ్ నటి విద్యాబాలన్ నటిస్తోంది. చంద్రబాబు నాయుడు పాత్రలో రానా దగ్గుబాటి, కృష్ణ పాత్రలో మహేష్ బాబు, అక్కినేని నాగేశ్వరరావు పాత్రలో నాగ చైతన్యను తీసుకున్నారని, ఈ చిత్రంలో మోహన్ బాబు, రాజశేఖర్ తదితరులు నటిస్తున్నారని తాజా సమాచారం. ఇక రాజకీయాలకు సంబంధించి నాదెండ్ల భాస్కరరావు పాత్ర కూడా ఉంటుందని, ఆ పాత్రలో బాలీవుడ్ నటుడు సచిన్‌ కెడెకర్‌ నటిస్తారని టాక్. ఎన్‌.బి.కె. ఫిల్మ్స్‌ పతాకంపై నిర్మిస్తున్న ఈ చిత్రానికి క్రిష్‌ జాగర్లమూడి దర్శకత్వం వహిస్తున్నారు.
