શપથ લેતા કહ્યું હતું કોઈ કસર નહીં છોડું, હવે આયુષ્યમાનમાં મળી શકે છે 10 લાખનું વીમા કવચ!

Ayushman Bharat-PMJAY: PM નરેન્દ્ર મોદીના નેતૃત્વમાં કેન્દ્રમાં NDA સરકાર આ મહિને સંપૂર્ણ બજેટ (Union Budget 2024) રજૂ કરવા જઈ રહી છે. આ વખતે દેશમાં ગઠબંધન સરકાર બની છે. તેથી લોકો એવી અપેક્ષા રાખી રહ્યા છે કે સરકાર આ બજેટમાં પ્રધાનમંત્રી જન આરોગ્ય યોજના (PMJAY) અને આયુષ્માન ભારત યોજનાને લઈને કેટલીક મોટી જાહેરાતો કરી શકે છે. રિપોર્ટ અનુસાર કેન્દ્ર આયુષ્માન ભારત યોજના હેઠળ કવરેજ મર્યાદા 5 લાખ રૂપિયાથી વધારવા પર વિચાર કરી રહી છે.

બીમા કવરેજ લિમિટમાં થશે વધારો!
એનડીએ સરકાર આયુષ્માન ભારત-પ્રધાનમંત્રી જન આરોગ્ય યોજનાના લાભાર્થીઓની સંખ્યા અને વીમા રકમ બંને વધારવા પર વિચાર કરી રહી છે. સૂત્રોને ટાંકીને એવું કહેવામાં આવ્યું છે કે યોજના હેઠળ લાભાર્થીઓ માટે કવરેજ મર્યાદા 5 લાખ રૂપિયાથી વધારીને 10 લાખ રૂપિયા પ્રતિ વર્ષ કરવાની તૈયારીઓ છે. અહેવાલ અનુસાર, NDA સરકાર આગામી ત્રણ વર્ષમાં તેની મુખ્ય આયુષ્માન ભારત સ્વાસ્થ્ય વીમા યોજના હેઠળ લાભાર્થીઓની સંખ્યા બમણી કરવા પર વિચાર કરી રહી છે.

કવરેજ દરખાસ્તને અંતિમ સ્વરૂપ આપવાની તૈયારી
જો સરકાર આગામી ત્રણ વર્ષમાં AB-PMJAY હેઠળ લાભાર્થીઓની સંખ્યા બમણી કરવાની જાહેરાત કરે છે, તો દેશની બે તૃતીયાંશથી વધુ વસ્તી આરોગ્ય કવચ મેળવી શકશે. અહેવાલમાં સૂત્રોએ જણાવ્યું છે કે સરકાર આ બાબતે વિચારણા કરી રહી છે કારણ કે સારવાર પર થતો જંગી ખર્ચ પરિવારોને દેવાની જાળમાં ધકેલવાનું સૌથી મોટું કારણ છે. તેમણે કહ્યું કે આને ધ્યાનમાં રાખીને સરકાર આયુષ્માન યોજનાની કવરેજ રકમની મર્યાદા વર્તમાન રૂ. 5 લાખથી વધારીને રૂ. 10 લાખ કરવાના પ્રસ્તાવને અંતિમ સ્વરૂપ આપવા પર પણ વિચારણા કરી રહી છે.

સરકારી તિજોરી પર વધશે આટલો બોજ 
કેન્દ્ર સરકાર આ મહિને સામાન્ય બજેટ રજૂ કરવા જઈ રહી છે અને તેની તારીખ 23 જુલાઈ નક્કી કરવામાં આવી છે. આ દરખાસ્તો અથવા તેના કેટલાક ભાગો આ બજેટમાં જાહેર કરવામાં આવે તેવી અપેક્ષા છે. રિપોર્ટ અનુસાર, જો આ દરખાસ્તોને મંજૂરી આપવામાં આવે છે તો નેશનલ હેલ્થ ઓથોરિટી દ્વારા તૈયાર કરાયેલા અંદાજ મુજબ સરકારી તિજોરી પર દર વર્ષે 12,076 કરોડ રૂપિયાનો વધારાનો બોજ પડશે. અન્ય એક સૂત્રએ જણાવ્યું કે 70 વર્ષથી વધુ ઉંમરના લોકો સહિત લગભગ 4-5 કરોડ વધુ લાભાર્થીઓને આ યોજના હેઠળ સામેલ કરવામાં આવશે.

મોંઘી સારવારમાંથી લોકોને મળશે રાહત 
નોંધનીય છે કે આયુષ્માન ભારત-PMJAY માટે 5 લાખ રૂપિયાની મર્યાદા વર્ષ 2018માં નક્કી કરવામાં આવી હતી. હવે મોંઘવારી અને ટ્રાન્સપ્લાન્ટ સહિતની અન્ય મોંઘી સારવારના કિસ્સામાં પરિવારોને રાહત આપવાના ઉદ્દેશ્ય સાથે આ યોજના હેઠળ ઉપલબ્ધ કવરેજ મર્યાદાને બમણી કરવાની વિચારણા કરવામાં આવી રહી છે. તમને જણાવી દઈએ કે રાષ્ટ્રપતિ દ્રૌપદી મુર્મુએ 27 જૂને સંસદના સંયુક્ત સત્રને સંબોધિત કરતા કહ્યું હતું કે 70 વર્ષથી વધુ ઉંમરના તમામ વૃદ્ધોને પણ આયુષ્માન યોજના હેઠળ આવરી લેવામાં આવશે અને તેમને મફત સારવારની સુવિધા મળશે.