કાંકરીયામાં પહેલીવાર : સિક્કો નાંખો અને ટોયલેટનો ઉપયોગ કરો

અર્પણ કાયદાવાલા/અમદાવાદ : સામાન્ય રીતે જાહેર શૌચાલય અંગે લોકોની પ્રતિક્રીયા અને અનુભવ સારા નથી હોતા. કારણ કે જાહેર શૌચાલયોની સફાઇ અંગે ક્યારેય પૂરતુ ધ્યાન ન અપાતુ હોવાથી લોકો તેનો ઉપયોગ નાછુટકે કરતા હોય છે. પરંતુ તમને કોઇ એમ કહે કે હવે સરકારના અત્યંત સ્વચ્છ અને સુવાસથી મહેકતા ટોઇલેટનો ઉપયોગ કરવા મળશે તો????  જી હા, આવું જ કઇ શક્ય બનશે આગામી દિવસોમાં મેગા સિટી અમદાવાદમાં. ગુજરાતના આ નંબર વન શહેરમાં પહેલીવાર ઈ-ટોયલેટની સુવિધા શરૂ થવા જઈ રહી છે.

અમદાવાદ મ્યુનિસિપલ કોર્પોરેશન દ્વારા ગુજરાતમાં પ્રથમવાર ઈ-ટોયલેટનો પ્રયોગ કાંકરીયા કેમ્પસમાં કરાશે. અહીં 8 લાખના ખર્ચે ઇ-ટોઇલેટ લગાવવામા આવશે. ઇ-ટોઇલેટ સ્માર્ટસિટી પ્રોજેક્ટ અંતર્ગત પ્રાયોગિક ધોરણે ઉપયોગમાં લેવાશે.  લોકો ગણતરીના દિવસોમાં ઉપયોગ શરૂ કરી શકશે. ચલણી સિક્કો અથવા ટોકન નાંખ્યા બાદ જ તેને યુઝમાં લઈ શકાશે. આ પ્રયોગિક ઉપયોગ બાદ તેને નિયમિત ચલાવવામાં આવશે. 

ચેન્નાઇ-બેંગલુરૂ જેવા શહેરોમાં મોટાપાયે આવી નવતર સુવિધા આપવામાં આવી છે. ત્યારે ગુજરાતમાં પ્રથમવાર ઈ-ટોયલેટ જોવા મળશે. રૂ.8 લાખની કિંમતનું આ ઇ-ટોઇલેટ શહેરની ઓળખ એવા કાંકરીયા પરિસરમાં મૂકવામાં આવ્યુ છે. જેને ગણતરીના દિવસોમાં મુલાકાતીઓના ઉપયોગ માટે ખુલ્લુ મૂકવામાં આવશે. 

ઈ-ટોયલેટની ખાસિયત

• આ ઈ-ટોયલેટ ઇલેક્ટ્રિક સિસ્ટમથી કાર્યરત થાય છે. 
• ઇ-ટોઇલેટ ચલણી સિક્કો નાંખ્યા બાદ જ ઓપન થાય છે. 
• તેનો દરવાજો  ઇલેક્ટ્રોનીક ડિસ્પ્લે દ્વારા જોઇ શકાય છે.
• તેનો ઉપયોગ  ઓટોમેટિક પદ્ધતિથી થાય છે.
• વપરાશ બાદ તેની સફાઈ પણ આપોઆપ થાય છે. 

કાંકરીયા પરીસરના ગેટ નંબર 2 પાસે મ્યુનિસિપલ કોર્પોરેશન દ્વારા આ ઇ-ટાઇલેટને ઇન્સ્ટોલ કરાયું છે. જે માટે જરૂરી તમામ વીજળી અને ગટર કનેક્શન પણ ફીટ કરાયા છે. આ ઇ-ટોઇલેટ કેવી રીતે કામ કરે છે તેની જાણકારી પર ટોઇલેટના ગેટ પર આપવામાં આવી છે, જેથી નાગરિકો ક્યાંય ગૂંચવાય નહિ અને તેમને કોઈના મદદની જરૂર ન પડે.