રાજકોટ: ચાલુ ફરજે તબિયત લથડતા ઘરે નિકળેલા કોન્સ્ટેબલનું બાઇક અથડાતા મોત

રાજકોટ : રાજકોટના ગાંધીગ્રામ પોલીસ સ્ટેશનના ડ્રાઇવર તરીકે ફરજ બજાવતા હેટ કોન્સ્ટેબલ અશ્વિનભાઇ મદ્રેસાણીયાની આજે ચાલુ ફરજે તબિયત બગડી હતી. જેથી તે પોતાનાં ઘરે જઇ રહ્યા હતા. દરમિયાન રસ્તામાં ચક્કર આવતા બાઇક થાંભલા સાથે અથડાતા બેભાન થઇ ગયા હતા. તેમને સારવાર માટે હોસ્પિટલ ખાતે ખસેડાયા હતા. જેનું મોત નિપજ્યું હતું.

અશ્વિનભાઇને સંતાનમાં એક પુત્ર અને એક પુત્રી છે. અગાઉ તેઓ એ ડિવીઝન પોલીસ સ્ટેશનમાં અને પ્રદ્યુમન નગર પોલીસ સ્ટેશનમાં ફરજ બજાવી ચુક્યા છે. હાલમાં તેઓ ગાંધીગ્રામ પીઆઇનાં ડ્રાઇવર તરીકે ફરજ બજાવતા હતા. જો કે તેમનું મોત નિપજતાં પોલીસ બેડામાં શોકની લાગણી છવાઇ હતી. 

જો કે ચાલુ ફરજે અશ્વિનભાઇનું અવસાન થતા ગાર્ડ ઓફ ઓનર આપવામાં આવ્યું હતું. કર્મચારી બેડામાં પણ શોકની લાગણી વ્યાપી હતી. અશ્વિનભાઇનું અવસાન થતા પરિવાર પર આભ ફાટી પડ્યું હતું. એક પુત્ર અને એક પુત્રી પિતા વગરનાં નોંધારા થયા છે. પરિવાર પણ ઘટનાને પગલે શોકસંતપ્ત થયો છે.