KXIPvsCSK: ડુ પ્લેસિસ અને વોટસનના વાવાઝોડામાં ઊડી ગયું પંજાબ, ચેન્નઈનો 10 વિકેટે વિજય

દુબઈઃ ફાફ ડુ પ્લેસિસ (87*) અને શેન વોટસન (83*)ની દમદાર બેટિંગની મદદથી ચેન્નઈ સુપર કિંગ્સે આખરે સતત ત્રણ પરાજય બાદ કિંગ્સ ઇલેવન પંજાબને 10 વિકેટે પરાજય આપી ટૂર્નામેન્ટમાં બીજી જીત મેળવી છે. પ્રથમ બેટિંગ કરતા કિંગ્સ ઇલેવન પંજાબે 20 ઓવરમાં 4 વિકેટે 178 રન બનાવ્યા હતા. જેના જવાબમાં ચેન્નઈ સુપર કિંગ્સ 17.4 ઓવરમાં વિના વિકેટે 181 રન બનાવી મેચ પોતાના નામે કરી લીધી હતી. પંજાબનો આ ટૂર્નામેન્ટમાં ચોથો પરાજય છે. તેણે પાંચમાંથી એક મેચમાં જીત મેળવી છે. જ્યારે ચેન્નઈએ અત્યાર સુધી પાંચ મેચ રમી છે, જેમાં ત્રણમાં હાર અને બે મેચમાં જીત મળી છે. 

શેન વોટસન ફોર્મમાં આવી ગયો
પંજાબે આપેલા 179 રનના લક્ષ્યનો પીછો કરવા ઉતરેલી ચેન્નઈ સુપર કિંગ્સને શેન વોટસન અને ફાફ ડુ પ્લેસિસે શાનદાર શરૂઆત અપાવી હતી. શેન વોટસન આખરે આઈપીએલ 2020મા ફોર્મમાં આવી ગયો છે. બંન્ને ખેલાડીઓએ પાવરપ્લેમાં 60 રન જોડ્યા હતા. શેન વોટસને 31 બોલમાં પોતાની અડધી સદી પૂરી કરી હતી. તો ફાફ ડુ પ્લેસિસે 33 બોલમાં પોતાની અડધી સદી પૂરી કરી હતી. 

બંન્ને ખેલાડીઓએ 17.4 ઓવરમાં 181 રન બનાવી ટીમને 10 વિકેટે વિજય અપાવ્યો હતો. શેન વોટસને 53 બોલમાં 11 ચોગ્ગા અને 3 છગ્ગા સાથે અણનમ 83 રન બનાવ્યા હતા. તો ફાફ ડુ પ્લેસિસ 53 બોલમાં 11 ચોગ્ગા અને 3 છગ્ગા સાથે 87 રન બનાવી અણનમ રહ્યો હતો. 

ચેન્નઈ માટે કરી સૌથી મોટી ઓપનિંગ પાર્ટનરશિપ
આજે શેન વોટસન અને ફાફ ડુ પ્લેસિસ બંન્ને ફોર્મમાં જોવા મળ્યા હતા. બંન્નેએ ચેન્નઈ સુપર કિંગ્સ તરફથી પ્રથમ વિકેટ માટે સૌથી મોટી ભાગીદારી બનાવવાનો રેકોર્ડ બનાવ્યો છે. આ પહેલા ચેન્નઈ તરફથી પ્રથમ વિકેટ માટે સૌથી મોટી ભાગીદારીનો રેકોર્ડ મુરલી વિજય અને માઇક હસીના નામે હતી. આ બંન્ને ખેલાડીઓએ 2011મા આરસીબી સામે 159 રનની ભાગીદારી કરી હતી. શેન વોટસન અને ફાફ ડુ પ્લેસિસે 181 રનની ભાગીદારી કરી હતી. 

કેપ્ટન રાહુલની વધુ એક અડધી સદી
ચેન્નઈ વિરુદ્ધ ઈનિંગની શરૂઆત કરવા આવેલ નિયમિત ઓપનર કેએલ રાહુલ અને મયંક અગ્રવાલની જોડી મેદાન પર ઉતરી હતી. બંન્નેએ પાવરપ્લેમાં 46 રન જોડ્યા હતા. 9મી ઓવરમાં મયંક અગ્રવાલને પીયૂષ ચાવલાએ 26 રન પર આઉટ કર્યો હતો. બીજી વિકેટ મનદીપના રૂપમાં પડી હતી. મનદીપ 27 રન બનાવી રવીન્દ્ર જાડેજાનો શિકાર બન્યો હતો. 

પંજાબની ટીમને ત્રીજો ઝટકો નિકોલસ પૂરનના રૂપમાં લાગ્યો હતો. પૂરન 17 બોલમાં 33 રન બનાવી શાર્દુલ ઠાકુરના બોલ પર આઉટ થયો હતો. કેએલ રાહુલે એકવાર ફરી દમદાર પ્રદર્શન કરતા અડધી સદી ફટકારી હતી. રાહુલ 52 બોલમાં 63 રન બનાવી આઉટ થયો હતો. આ દરમિયાન તેણે 7 ચોગ્ગા અને 1 છગ્ગો ફટકાર્યો હતો. ગ્લેન મેક્સવેલ 7 બોલ પર 11 અને સરફરાઝ ખાન 9 બોલ પર 14 રન બનાવી અણનમ રહ્યાં હતા. 

ચેન્નઈ સુપર કિંગ્સ તરફથી શાર્દુલ ઠાકુરે 4 ઓવરમાં 39 રન આપી બે વિકેટ ઝડપી હતી. આ સિવાય રવીન્દ્ર જાડેજા અને પીયૂષ ચાવલાને એક-એક સફળતા મળી હતી.