భార్య మృతి తట్టుకోలేక వారం లోపే జవాన్ ఆత్మహత్య

కట్టుకున్న భార్యకు ఏ మాత్రం విలువ ఇవ్వని ఈ లోకంలో, భార్య చనిపోతే తనతో పాటే చనువు చాలించిన భర్తలు కూడా ఉన్నారు. భార్య చనిపోవటంతో శ్రీకాకుళం జిల్లాకు చెందిన ఆర్మీ జవాన్‌ రాజబాబు తనువు చాలించడం స్థానికంగా కలచివేసింది.

Crime News: కట్టుకున్న భార్యలను కడతేర్చే వారు ఉన్న ఈ కాలంలో అదే భార్య చనిపోతే తాను కూడా తనువు చాలించే భర్తలు కూడా ఉన్నారు. అమితంగా ప్రేమించిన భార్య చనిపోవడంతో ఆమె లేని ఈ లోకంలో ఉండటం తనవల్ల కాదు అంటూ తనువు చాలిస్తున్న భర్తలు ఈమధ్య కాలంలో ఎక్కువ అయ్యారు. ఆ మధ్య ఏపీలో ఒక భర్త తన భార్య చనిపోవడంతో ఆ దుఃఖంతోనే మృతి చెందిన విషయం మర్చిపోకుండానే శ్రీకాకుళం జిల్లాకు చెందిన ఆర్మీ జవాన్‌ రాజబాబు తనువు చాలించడం స్థానికంగా కలచివేసింది. భార్య చనిపోయిన వారం రోజుల్లోపే రాజబాబు ఆత్మహత్య చేసుకుని తన భార్య వద్దకు చేరుకున్నాడు. 

పూర్తి వివరాల్లోకి వెళ్తే.. శ్రీకాకులం జిల్లా ఆమదాలవలస మండలం ఈసర్లపేట గ్రామానికి చెందిన మంగరాజు రాజబాబు కు 2016 లో ఇండియన్ ఆర్మీలో జవాన్ గా ఉద్యోగం లభించింది. అప్పటి నుండి విధులు నిర్వహిస్తున్న రాజబాబు 2022 ఫిబ్రవరిలో అదే గ్రామానికి చెందిన మౌనికను వివాహం చేసుకున్నాడు. ప్రస్తుతం మౌనిక గర్భవతి అవ్వడంతో ఆమెను సొంత ఊర్లో ఉంచి రాజాబాబు హరియాణాలో విధులు నిర్వహిస్తున్నాడు. గర్భవతి అయిన మౌనిక ఇటీవల అస్వస్థతకు గురి అయ్యింది. దాంతో వెంటనే మౌనికను రాజాబాబు తండ్రి సత్యనారాయణ విశఖపట్నంలోని ఆర్మీ ఆసుపత్రిలో జాయిన్ చేశాడు. అక్కడ చికిత్స అందుతున్న సమయంలోనే రాజా బాబుకు సమాచారం అందించాడు.

భార్య అనారోగ్య సమస్యల నేపథ్యంలో రాజాబాబు సెలవులపై హుటాహుటీన విశాఖపట్నం చేరుకున్నాడు. కొన్ని రోజుల పాటు చికిత్స అందించినా కూడా మౌనిక ప్రాణాలు కాపాడలేక పోయారు. ఈనెల 16వ తారీకున మౌనిక మృతి చెందింది. మౌనిక మృతిని జీర్ణించుకోలేక పోయిన రాజా బాబు అప్పటి నుండి కూడా సరిగా తినకుండా.. ఎవరితో సరిగా ఉండకుండా మూడీగా ఉంటున్నాడు. ఆయన్ను కుటుంబ సభ్యులు ఎంతగా జనాల్లో కలిపేందుకు ప్రయత్నించినా కూడా అతడు మాత్రం తన భార్య మరణం నుండి తేరుకోలేక పోయాడు. మౌనిక లేని ఈ లోకంలో తాను ఉండలేను అంటూ ఆత్మహత్యకు సిద్ధం అయ్యాడు.

ఈనెల 19వ తారీకున ఆరోగ్యం సరిగాలేదు ఆసుపత్రికి వెళ్తున్నాను అంటూ ఇంట్లో చెప్పి ఆమదాలవలసలో రైలు ఎక్కి పొందూరుకి వెళ్లాడు. అక్కడ నుండి తన స్నేహితులకు తాను ఆత్మహత్య చేసుకోబోతున్నట్లుగా సమాచారం ఇచ్చాడు. దాంతో వెంటనే పోలీసులకు వారు సమాచారం ఇవ్వడంతో పోలీసులు వెదికారు. చివరకు కొంచాడ సమీపంలోని ఒక తోటలో చెట్టుకు ఉరి వేసుకుని చనిపోయినట్లుగా గుర్తించారు. రాజాబాబు చనిపోవడంతో కుటుంబ సభ్యులు మరియు మిత్రులు దుఃఖంలో మునిగి పోయారు. భార్య లేని ఈ లోకంలో తాను ఉండలేనని రాజాబాబు చనిపోయిన తీరు స్థానికంగా సంచలనం సృష్టించింది. పోలీసులు కేసు నమోదు చేసినట్లుగా పేర్కొన్నారు.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.