Hydrogen Train Photos: టెక్నాలజీలో, కొత్త సాంకేతికను అందిపుచ్చుకోవడంలో ప్రపంచ దేశాల కంటే ఎప్పుడూ ముందే ఉండాలని తెగ ఉబలాటపడే చైనా తాజాగా హైడ్రోజన్ ట్రైన్‌ను ప్రవేశపెట్టింది. కొత్తగా లాంచ్ చేసిన ఈ హైడ్రోజన్ ట్రెయిన్ సెమీ హై స్పీడ్ కేటగిరీకి చెందిన రైలుగా చైనా ప్రకటించింది. ఆసియాలో మొట్టమొదటి హైడ్రోజన్ ట్రైయిన్ ఇదే కావడం గమనార్హం. ప్రపంచంలో అయితే మొట్టమొదటిసారిగా హైడ్రోజన్ ట్రైన్‌ని లాంచ్ చేసిన ఘనతను జర్మనీ సొంతం చేసుకుంది. ఆసియాలో ఆ ఘనత తమకే సొంతం కావాలన్న ఉద్దేశంతో కొత్తగా చైనా ఈ సెమీ హై స్పీడ్ హైడ్రోజన్ ట్రైన్‌ని లాంచ్ చేసింది.
చైనాలోని అర్బన్ రైల్వే విభాగం కోసం చైనాకు చెందిన చైనా రైల్వే రోలింగ్ స్టాక్ కార్పొరేషన్ లిమిటెడ్ (CRRC) ఈ హైడ్రోజన్ ట్రెయిన్స్‌ని రూపొందించింది. ఇందులో నాలుగు బోగీలు ఉంటాయి.
గంటకు 160 కిమీ వేగంతో నడిచే ఈ సెమీ హై స్పీడ్ హైడ్రోజన్ ట్రైన్ లో ఒక్కసారి హైడ్రోజన్ ఇంధనం నింపితే.. 600 కిమీ ఆగకుండా పరిగెత్తగలదు. అది హైడ్రోజన్ రైలు రేంజ్ సామర్ధ్యం.
చైనా కోసం చైనా రైల్వే రోలింగ్ స్టాక్ కార్పొరేషన్ లిమిటెడ్ గతంలోనూ పలు సరికొత్త ఆవిష్కరణలు చేసింది. ఈ సెమీ హై స్పీడ్ హైడ్రోజన్ ట్రెయిన్ ప్రాజెక్ట్ కోసం చైనా రైల్వే రోలింగ్ స్టాక్ కార్పొరేషన్ లిమిటెడ్ సరికొత్త డిజిటల్ టెక్నాలజీని ఉపయోగించినట్టు తెలుస్తోంది.
ప్రస్తుతం ఉపయోగిస్తున్న డిజీల్ ఇంజిన్స్‌తో పోల్చుకుంటే ఈ హైడ్రోజన్ ట్రెయిన్స్ వల్ల కార్బన్ డయాక్సైడ్ వాయువు వ్యర్థాలు ఏడాదికి 10 టన్స్ తగ్గిపోతాయని చైనా భావిస్తోంది.
