સીબીઆઇ જજ લોયા મોત કેસની SIT તપાસ નહીં થાય, સુપ્રીમ કોર્ટે અરજી રદ કરી

નવી દિલ્હી : સોહરાબુદ્દીન શેખ નકલી એન્કાઉન્ટર કેસની સુનાવણી કરનાર સીબીઆઇની વિશેષ અદાલતના જજ રહી ચૂકેલા બી એચ લોયાના કથિત શંકાસ્પદ મોતની સ્વતંત્ર તપાસ કરાવવાની માંગ સાથેની તમામ અરજીઓને ગુરૂવારે સુપ્રીમ કોર્ટે રદ કરી છે. આ અરજીઓમાં એસઆઇટી તપાસની માંગ કરવામાં આવી હતી. લોયાનું મોત 1લી ડિસેમ્બર 2014ના રોજ કથિત રીતે હ્રદય રોગના હુમલાથી એ વખતે થયું જ્યારે તેઓ પોતાના એક સહકર્મીના પુત્રીના લગ્નમાં હાજરી આપવા નાગપુર ગયા હતા. મુખ્ય ન્યાયાધીશ દિપક મિશ્રા અને ન્યામૂર્તિ એ એમ ખાનવિલકર અને ડી વાઇ ચંદ્રચૂડની પીઠે 16 માર્ચે આ અરજી પર પોતાનો ફેંસલો અનામત રાખ્યો છે. 

મહારાષ્ટ્ર સરકારે મુખ્ય ન્યાયાલયમાં દલીદી કરી હતી કે લોયાના મોતની સ્વતંત્ર તપાસ કરવાની માંગની તમામ અરજીઓ પ્રેરીત છે અને એનો ઉદ્દેશ કાયદો અને વ્યવસ્થાની સ્થિતિ બકરાર રાખવાની દુહાઇ આપી એક વ્યક્તિને નિશાન બનાવવાનું છે. રાજ્ય સરકારે લોયા કેસ મામલે કેટલાક વકીલો તરફથી મુખ્ય ન્યાયાલયના ન્યાયાધીશ પ્રતિ આક્રમક વલણ અપનાવવા અને આ મામલા સાથે જોડાયેલા આરોપો પર ફિટકાર કરતાં કહ્યું હતું કે, ન્યાયપાલિકા અને ન્યાયિક અધિકારોને આવા વ્યવહારથી બચાવવાની જરૂર છે.

સોહરાબુદ્દીન શેખ નકલી એન્કાઉન્ટર કેસ મામલે ભાજપા અધ્યક્ષ અમિત શાહ, રાજસ્થાનના ગૃહ મંત્રી ગુલાબચંદ કટારિયા, રાજસ્થાનના વેપારી વિમલ પટણી, ગુજરાતના પૂર્વ પોલીસ વડા પી સી પાંડે, એડિશનલ પોલીસ મહાનિર્દેશક ગીતા જોહરી અને ગુજરાત પોલીસના અધિકારીઓ અભય ચૂડાસમા, એન કે અમીન આ કેસમાં અગાઉથી આરોપ મુક્ત થયા છે. પોલીસ કર્મીઓ સહિત કેટલાય આરોપીઓ  સામે હજુ સોહરાબુદ્દીન શેખ અને એની પત્ની કૌશરબી અને એના સાથી તુલસીરામ પ્રજાપતિના કથિત નકલી એન્કાઉન્ટર કેસ ચાલી રહ્યો છે. આ કેસની તપાસ બાદમાં સીબીઆઇને સોંપવામાં આવી હતી અને સુનાવણી ગુજરાતથી ખસેડી મહારાષ્ટ્રમાં સ્થળાંતરીત કરાઇ હતી.