'ગિલગિટ-બાલ્ટિસ્તાનના નામે વાયરલ થઈ રહેલું ટ્વિટર હેન્ડલ અમારું નથી', ભારત સરકારની સ્પષ્ટતા

નવી દિલ્હી: ટ્વીટર પર ગિલગિટ-બાલ્ટિસ્તાનના નામે લોન્ચ થયેલા એક ટ્વીટર હેન્ડલ પર ભારત સરકારે સ્પષ્ટતા કરી છે કે આ ટ્વીટર હેન્ડલ સાથે તેમને કોઈ લેવાદેવા નથી. @GB_Ladakh_India નામના આ ટ્વીટર હેન્ડલને ફોલો કરવા માટે જાણે ટ્વીટર પર હોડ મચી છે. આ મહિને એટલે કે મેમાં જ બનેલા આ એકાઉન્ટમાં જે જાણકારી છે તેમાં દાવો કરવામાં આવ્યો છે કે તે કેન્દ્રશાસિત લદાખનું અધિકૃત ટ્વીટર હેન્ડલ છે. પરંતુ સરકારે સ્પષ્ટતા કરી કે આ એકાઉન્ટમાં અપાયેલી જાણકારી સાચી નથી. 

કેન્દ્રીય ગૃહ મંત્રાલયના પ્રવક્તાએ કહ્યું છે કે કેન્દ્રશાસિત લદાખનું ફક્ત @DIPR_LEH અને @informationDep4 નામથી ટ્વીટર હેન્ડલ છે. આ ઉપરાંત તેમને અન્ય કોઈ ટ્વીટર હેન્ડલ સાથે લેવાદેવા નથી.

@GB_Ladakh_India ના આ એકાઉન્ટની જાણ થતા જ લોકોમાં તેને ફોલો કરવા માટે જાણે હોડ મચી છે. ગિલગિટ-બાલ્ટિસ્તાન પર પાકિસ્તાને ગેરકાયદેસર રીતે કબ્જો જમાવી રાખ્યો છે. ભારત સરકાર પાકિસ્તાનને વારંવાર આ વિસ્તારમાંથી પીછે હટવાની અપીલ કરે છે. આ ટ્વીટર હેન્ડલ પર જે જાણકારી આપવામાં આવી છે તેમાં કહેવાયું છે કે ગિલગિટ-બાલ્ટિસ્તાન લદ્દાખ (કેન્દ્રશાસિત પ્રદેશ)નું આ અધિકૃત ટ્વીટર હેન્ડલ છે. આ સાથે જ તેનું લોકેશન પણ ગિલગિટ-બાલ્ટિસ્તાન, લદાખ (UT) દર્શાવવામાં આવ્યું છે. ટ્વીટર પર જે જાણકારી આપવામાં આવી છે તેમાં લદાખ પ્રશાસનની યૂઝર લિંક પણ સામેલ કરાઈ છે. 

જુઓ LIVE TV

ટ્વીટર પર લોન્ચ થતાની સાથે જ આ ટ્વીટર હેન્ડલ વાયરલ થયું છે. તેને ફોલો કરનારાઓની સંખ્યા હજારોમાં પહોંચી ગઈ છે. થોડા દિવસ અગાઉથી જ ભારતીય હવામાન ખાતા (IMD)એ ગિલગિટ-બાલ્ટિસ્તાન અને મુઝફ્ફરાબાદના મૌસમના હાલ બતાવવાના શરૂ કરી દીધા છે. ભારત સરકારના આ પગલાંથી પાકિસ્તાને એટલું ઉકળ્યું છે કે તેના જવાબમાં રેડિયો પાકિસ્તાને જમ્મુ અને કાશ્મીરના હવામાનના હાલચાલ બતાવવાનું શરૂ કરી દીધુ.