Vizag GasLeak: ખતરનાક સ્ટાઈરીન ગેસ માણસને જોતજોતામાં ભોયભેગો કરી દે છે

ઝી મીડિયા/બ્યૂરો :વિશાખાપટ્ટનમના આર.આર. વેંકટપુરમ ગામમાં આજે વહેલી સવારે 2.30 કલાકે એક ફાર્મા કંપનીના પ્લાન્ટમાં ગેસ લીક (Vizag Gas Leak) થવાને કારણે એક બાળક સહિત 8 લોકોના મોત નિપજ્યાં છે. જ્યારે કે, 100 લોકોની હાલત હજી ગંભીર બતાવાઈ રહી છે. 1000થી વધુ લોકોને હોસ્પિટલમાં ભરતી કરવામાં આવ્યા છે. આ ગેસ લીકને કારણે 3 કિલોમીટર સુધીનો વિસ્તાર પ્રભાવિત થયો છે. સાવચેતીના ભાગરૂપે 6 ગામોને ખાલી કરાવાયા છે. આ ઘટના બાદ સમગ્ર શહેરમાં દહેશતનો માહોલ ફેલાઈ ગયો હતો. લોકોને દરવાજા તોડીને ઘરની બહાર કાઢવામાં આવ્યા હતા. તો સાથે જ રસ્તા પર ઠેકઠેકાણે ઢળી પડેલા લોકો જોવા મળ્યા હતા. 

સ્ટાઈરીન ગેસ કેટલી ખતરનાક

• આ ગેસ પ્લાસ્ટિક, પેટ, ટાયર જેવી ચીજો બનાવવામાં ઉપયોગી થાય છે
• શરીરમાં જવાથી બળતરા, સેન્ટ્રલ નર્વસ સિસ્ટમ પર સીધી અસર થાય છે. 
• સ્ટાઈરીન ગેસ બાળકો, શ્વાસના દર્દીઓ માટે બહુ જ ખતરનાક

સ્ટાઈરીન ગેસની શરીર પર અસર
સ્ટાઈરીન ગેસ શરીર પર ખતરનાક હદે અસર કરે છે. આ ગેસના સંપર્કમાં આવનાર વ્યક્તિને શ્વાસ લેવામાં તકલીફ, શરીરમાં રેશિઝ, આંખોમાં બળતરા, ઉલટી તેમજ બેહોશ થવાની તકલીફ થાય છે. આવામાં દર્દીનો જીવ પણ જઈ શકે છે. 

ઘટના બનતા જ સ્થાનિક તંત્ર અને નેવીએ સાથે મળીને આસપાસના ગામડાઓને ખાલી કરાવ્યા હતા. તેમનુ કહેવુ છે કે, બે કલાકની અંદર જ પરિસ્થિતિને નિયંત્રણમાં લઈ લીધી હતી. કેટલાક લોકોને શ્વાસ લેવામાં તકલીફ થઈ રહી હતી, તેઓને ઓક્સિજન આપવામાં આવી રહ્યું છે.