திண்டுக்கல் மாவட்டம் சித்தையன்கோட்டை அருகே உள்ளது சேடப்பட்டி கிராமம்... விடிந்ததும் ஊருக்கு ஒதுக்குப் புறமாக இருக்கும் காமராஜர் அணையின் கரை ஓரத்திற்குச் சென்ற இளைஞர்கள் மிரண்டு போனார்கள். ஆள் நடமாட்டம் இல்லாத புதர் பகுதியில் சாக்கு மூட்டை ஒன்று கிடந்தது. அருகே சென்று பார்க்க, மூட்டையில் இருந்து ரத்தம் சொட்டு சொட்டாக விழுந்தது. அதைத் தூக்கிப் பார்த்தபோது மூட்டையில் மனிதக் கால்கள்...
அதிர்ச்சியில் உறைந்துபோன இளைஞர்கள் அப்படியே போட்டுவிட்டு ஊருக்குள் ஓடியிருக்கிறார்கள். சென்ற வேகத்தில் செம்பட்டி காவல்நிலையத்திற்கு போன் அடிக்கப்பட்டது. தகவல் கிடைத்ததும் சம்பவ இடத்திற்கு போலீஸார் வந்து சேர்ந்தனர். சாக்கு மூட்டையில் மனித உடல் ஒன்று சடலமாகக் கிடப்பதும்; கொடூரமாகக் கொலை செய்யப்பட்டு வீசப்பட்டிருப்பதும் தெரியவந்தது. உடனே வந்திருந்த போலீஸார், உயரதிகாரிகளுக்கு உடனே தகவல் கொடுத்தனர். அடுத்தடுத்த போலீஸ் வாகனம் ஊருக்குள் நுழைந்தது. பெரும் போலீஸ் படையே சம்பவ இடத்தில் குவிக்கப்பட்டது. அதற்குள் செய்தி ஊருக்குள் பரவியது. அப்போதுதான் ஊருக்குள் காணாமல் போன அழகு விஜய் என்ற இளைஞரின் நினைவு சட்டென்று எல்லோருக்கும் வந்தது.
பயந்து ஓடியவர்கள் சம்பவ இடத்திற்கு விரைந்தார்கள். உடலை நெருங்க முடியாதபடி, போலீஸார் அவர்களைத் தடுத்து நிறுத்தி பாதுகாப்பு வலைவிரித்தனர். சற்று நேரத்தில் ஆம்புலன்ஸ் வந்து சேர, உடலை சோதனை செய்த போலீஸார், ஊர்க்காரர்களை வரவழைத்து யார் என்று அடையாளம் காட்டச் சொன்னார்கள். ஆம், அதில் கொடூரமாக கொலை செய்யப்பட்டுக் கிடந்தது, காணாமல் போன அழகு விஜய்தான். 24 வயதே ஆன அழகு விஜய் கொலை செய்யப்பட என்ன காரணம் ? யாராக இருக்கும் ? என்ற கேள்விக்கான விடையை ஊர்க்காரர்களிடம் இருந்தே தேட ஆரம்பித்திருக்கிறார்.
எல்லாம் காதல்... காதல் விவகாரம்தான் அழகு விஜய்யை காவு வாங்கியது.
சேடப்பட்டி தெற்கு தெருவைச் சேர்ந்தவர் 24 வயதான அழகு விஜய். கொத்தனார் வேலை செய்து வந்தார். இதே பகுதியைச் சேர்ந்த இளம்பெண்ணை அழகு விஜய் காதலித்து வந்ததாகத் தெரிகிறது. இருவரின் காதல் விவகாரம் ஒரு கட்டத்தில் பெண்ணின் குடும்பத்தினருக்குத் தெரியவந்தது. அங்குதான் பிரச்சினை உருவெடுத்தது. பெண்ணின் அண்ணன் அஜித்குமார், அழகு விஜய்யைக் கடுமையாகக் கண்டித்திருக்கிறார். இதுகுறித்து அவ்வப்போது தகராறும் ஏற்பட்ட நிலையில் நேற்று இரவு காதலர்கள் இருவரும் தனிமையில் சந்தித்துப் பேசியதாகத் தெரிகிறது.
தங்கையைத் தேடி வந்த அண்ணன் அஜித்குமாரின் கண்களில் காதலர்கள் இருவரும் சிக்கிக் கொண்டனர்.பார்த்த உடன் அழகு விஜய்யைக் கடுமையாகத் தாக்க ஆரம்பித்தவர், ஒருகட்டத்தில் கழுத்தில் காலை வைத்து மிதித்துள்ளார். இதில் அழகு விஜய் சம்பவ இடத்திலேயே துடிதுடித்து உயிரிழந்தார். உயிர் பிரிந்து வெறி அடங்கிப் போன அஜித்குமார், சடலத்தை அருகே இருந்த தோட்டத்தில் மறைத்து வைத்து அவரின் தகப்பனாருக்குத் தகவல் கொடுத்திருக்கிறார்.
பின்னர், இருவரும் சேர்ந்து ஒரு சாக்குப்பையில் அழகு விஜய்யின் உடலைக் கட்டி, இருசக்கர வாகனத்தில் வைத்து அணைக் கரை ஓரத்தில் புதருக்குள் வீசிவிட்டுத் தப்பியோடினர். அதன் பின்னரே ஊர்க்காரர்களின் கண்ணில் பட்டு அவர் உடல் மீட்கப்பட்டது. உடலைப் பிரேதப் பரிசோதனைக்காக திண்டுக்கல் அரசு மருத்துவமனைக்கு அனுப்பி வைக்கப்பட்டது. விசாரணையில் ஊர்க்காரர்கள் சந்தேகத்தில் கைகாட்ட அஜித்குமாரின் தகப்பனார், தமிழ்ச்செல்வனைக் கைது செய்தனர்.
அப்போது அஜித்குமார் தப்பியோடி தலைமறைவானார். இதற்கிடையே, அஜித்குமாரைக் கைது செய்யக்கோரி உயிரிழந்தவரின் உறவினர்கள் சாலை மறியலில் ஈடுபட்டனர்.
பின்னர், கொலை வழக்குப்பதிவு செய்து தீவிர தேடுதல் வேட்டையில் இறங்கிய போலீஸாருக்கு அஜித்குமார் இருக்கும் இடம் குறித்துத் தெரியவந்தது. செல்போன் சிக்னலை வைத்து கர்நாடகா மாநிலம் மைசூர் பகுதியில் மடக்கிப் பிடித்து திண்டுக்கல் மாவட்ட தனிப்படை போலீஸார் கைது செய்தனர். இதனையடுத்து கைது செய்தவர்களிடம் கொலைக்கான காரணம் குறித்து தொடர்ந்து விசாரணை நடத்தி வருகின்றனர்.
மேலும் படிக்க | இதுவரை யாரும் பார்க்காத பிரபஞ்சத்தின் பிரமாண்டமான காட்சி!
காதல் விவகாரத்தில் இளைஞர் ஒருவர் கொடூரமாகக் கொலை செய்யப்பட்ட சம்பவம் திண்டுக்கல்லில் பெரும் அதிர்வலைகளை ஏற்படுத்தியுள்ளது. கடந்த 7 நாட்களில் திண்டுக்கல்லில் அரங்கேறியிருக்கும் 6-வது கொலை இது. இதனால் திண்டுக்கல்லில் சமீபகாலமாக அமைதி சீர்குலைந்து பதற்றம் பரவிக் கிடக்கிறது.
மேலும் படிக்க | 145 தடை : ஓபிஎஸ்-ஈபிஎஸ் ஆதரவாளர்கள் கத்திகுத்தும் போலீசாரின் மண்டை உடைப்பும்
சார்பில்லாத சமரசமில்லாத செய்திகள் உங்கள் உள்ளங்கைகளில்!
உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்.
முகநூலில் @ZEETamilNews, ட்விட்டரில் @ZeeTamilNews மற்றும் டெலிக்ராமில்https://t.me/ZeeTamilNews என்ற பக்கத்தை லைக் செய்யவும்.
கல்வி, பொழுதுபோக்கு, அரசியல், விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!
Android Link - https://bit.ly/3hDyh4G
Apple Link - https://apple.co/3loQYeR
