గాడ్, సెక్స్ అండ్ ట్రూత్ (జీఎస్‌టీ) పేరుతో చిత్రాన్ని తీసి.. శృంగారం పేరుతో ఆశ్లీలాన్ని ప్రమోట్ చేస్తున్నారంటూ ఫిర్యాదు అందిన క్రమంలో రామ్‌గోపాల్‌వర్మ పై కేసు నమోదు చేశామని హైదరాబాద్ సైబర్ క్రైమ్ అదనపు డీసీపీ గురువారం మీడియాకి తెలిపారు. ఈ ఫిర్యాదులో భాగంగా ఆయన విచారణకు హాజరు కావాలని తాకీదు పంపిస్తున్నామని ఆయన పేర్కొన్నారు.
ఒకవేళ ఈ తాకీదుకు స్పందించకపోతే.. అవసరాన్ని బట్టి తాము అరెస్టు చేయగలమని ఆయన ప్రకటించారు. ఇప్పటికే జీఎస్‌టీ చిత్రాన్ని నిషేధించాలని డిమాండ్ వస్తున్న క్రమంలో.. విచారణ జరిపి నిషేధించే సూచనలు కనిపిస్తున్నాయని పలువురు ప్రజా సంఘాల నేతలు అంటున్నారు. అలాగే ఆ చిత్రాన్ని ప్రదర్శిస్తున్న విమియో వీడియా ప్లాట్‌ఫారమ్‌కి ఇప్పటికే సైబర్ క్రైమ్ పోలీసులు సమాచారం అందించారు. వివాదాస్పదమైన ఆ చిత్రంపై కేసు నమోదైందని.. అందుకే ఆ చిత్రానికి ఆ ప్లాట్‌ఫారంలో పెయిడ్ యాక్సెస్ కూడా లేకుండా చేయాలని తెలిపారు.
రామ్‌గోపాల్‌వర్మ ఇటీవలే గాడ్, సెక్స్ అండ్ ట్రూత్ (జీఎస్‌టీ) పేరుతో హాలీవుడ్ పోర్న్ స్టార్ మియా మాల్కోవాని పెట్టి ఓ 20 నిమిషాల చిత్రాన్ని తెరకెక్కించారు. ఆ చిత్రానికి బ్యాక్ గ్రౌండ్ స్కోరుని ఎం.ఎం.కీరవాణి అందించారు. ఆ చిత్రంపై గతకొంతంగా పలు ప్రజాసంఘాలు విమర్శలు గుప్పించడం ప్రారంభించాయి. ఈ క్రమంలో ఆ సినిమాపై పాజిటివ్‌గా మాట్లాడుతున్నారన్న కారణంతో విమర్శకుడు కత్తి మహేష్, నటి గాయత్రి గుప్తాలపై కూడా మాటల దాడి జరిగింది.
ఈ క్రమంలో ఈ చిత్రంపై సర్వత్రా ఆసక్తి నెలకొంది. ఇటీవలే ఈ చిత్రాన్ని ఓ వెబ్ సైటుతో పాటు విమియోలో కూడా విడుదల చేసిన వర్మ.. దానిని డౌన్లోడ్ చేసుకోవడానికి కొంత రుసుము చెల్లించాల్సి ఉంటుందని కూడా తెలిపారు. పేమెంట్ గేట్ వే ద్వారా డబ్బు చెల్లించి ఆ చిత్రాన్ని డౌన్లోడ్ చేసుకోవచ్చని తెలిపారు.
