અભિનેત્રી ઉર્મિલા માર્તોંડકરે શિવસેના જોઈન કરી, માતોશ્રીમાં કર્યું આ કામ

મુંબઈ: ફિલ્મ અભિનેત્રી અને પૂર્વ કોંગ્રેસ નેતા ઉર્મિલા માર્તોંડકર ( Urmila Matondkar) આખરે શિવસેના (Shivsena) માં જોડાઈ ગઈ. મુખ્યમંત્રી ઉદ્ધવ ઠાકરે સાથે મુલાકાત માટે તે માતોશ્રી પહોંચી હતી. અહીં ઉદ્ધવ ઠાકરેના પત્ની રશ્મિ ઠાકરેએ ઉર્મિલાના હાથમાં રક્ષાસૂત્ર બાંધીને પાર્ટી જોઈન કરાવી. અત્રે જણાવવાનું કે 5 મહિના પહેલા જ ઉર્મિલાએ મુંબઈ કોંગ્રેસના કામકાજ પર સવાલ ઉઠાવીને પાર્ટી  છોડી હતી. શિવસેના સાંસદ સંજય રાઉતે અગાઉ એક ટ્વીટ કરીને પુષ્ટિ પણ કરી હતી કે ઉર્મિલા મંગળવારે શિવસેનામાં જોડાશે. જો કે ત્યારબાદ એવા પણ અહેવાલો હતા કે તે શિવસેનામાં જોડાવવાની નથી. આખરે ના ના કરતા ઉર્મિલા શિવસેનામાં જોડાઈ ગઈ. 

ઉર્મિલા માર્તોંડકરે શિવસેના સંસ્થાપક બાળ ઠાકરેની તસવીર આગળ નમન કર્યા. આ અગાઉ શિવસેનાએ વિધાન પરિષદ માટે રાજ્યપાલ ભગત સિંહ કોશ્યારીને મહાવિકાસ આઘાડી સરકાર તરફથી 12 નામની સૂચિ મોકલી હતી તેમા ઉર્મિલાનું પણ નામ હતું. ત્યારથી જ ઉર્મિલા શિવસેનામાં જોડાશે તેવી અટકળો થઈ રહી હતી. 

Mumbai: Actor turned politician Urmila Matondkar joins Shiv Sena, in the presence of party president Uddhav Thackeray pic.twitter.com/wMnZJatzHr

— ANI (@ANI) December 1, 2020

ઉર્મિલા તાજેતરમાં શિવસેનાને ખુબ ઉપયોગી નીવડી હતી. વાત જાણે એમ છે કે કંગના રનૌતે જ્યારે મુંબઈની સરખામણી પાક અધિકૃત કાશ્મીર સાથે કરી હતી ત્યારે તે વખતે મહાવિકાસ આઘાડીમાં શિવસેનાની મહયોગી કોંગ્રેસ અને એનસીપીએ ચૂપ્પી સાધી રાખી હતી. આ અસહજ સ્થિતિમાં ઉર્મિલાએ કંગનાના નિવેદનની ખુલીને ટીકા કરી હતી. 

એવી ચર્ચા પણ હતી કે કોંગ્રેસ પોતે ઉર્મિલાને વિધાન પરિષદ માટે નોમિનેટ કરી શકે છે. પરંતુ મુંબઈ કોંગ્રેસના નેતા સાથે મતભેદોના પગલે ઉર્મિલા તે માટે ઈચ્છુક નહતી. પરંતુ જ્યારે સીએમ ઉદ્ધવ ઠાકરેએ આ અંગે વાત કરી તો તે તૈયાર થઈ ગઈ. શિવેસનાના આ પ્રસ્તાવ પર કોંગ્રેસે પણ કોઈ વાંધો ન ઉઠાવ્યો. શિવસેનાએ પણ પોતાના બચાવમાં કહ્યું કે ઉર્મિલાએ તો  કોંગ્રેસ છોડી દીધી છે.