દિલ્હીમાં પ્રદૂષણની 'સુપર ઈમરજન્સી', AQI 999એ પહોંચ્યો, 32 ફ્લાઈટ્સ ડાઈવર્ટ કરાઈ

નવી દિલ્હી: દિલ્હી-NCRમાં પ્રદૂષણનું સ્તર જીવલેણ સ્તરે પહોંચી ગયું છે. પ્રદૂષણ વધવાથી દિલ્હીમાં વિઝિબ્લિટી પણ ઓછી થઈ ગઈ છે. જેના કારણે દિલ્હી એરપોર્ટ પર ઉડાણો ખુબ પ્રભાવિત થઈ છે. 

aqicn.orgના જણાવ્યાં મુજબ દિલ્હીમાં બપોરે 2 વાગે એક્યુઆઈ 999 રહ્યો. પૂસા પર એક્યુઆઈ 994, સત્યવતી કોલેજમાં એક્યુઆઈ 999, આઈટીઆઈ જહાંગીરપુરીમાં 999 જ્યારે સોનિયા વિહાર વોટરટ્રીટમેન્ટ પ્લાન્ટ પર એક્યુઆઈ 999 હતો. એવી આશા વ્યક્ત કરવામાં આવી રહી હતી કે રવિવાર સવારે થયેલા હળવા વરસાદથી પ્રદૂષણ ઓછુ થશે પરંતુ તેનાથી બિલકુલ ઉલ્ટુ જોવા મળી રહ્યું છે અને પ્રદૂષણ એટલું વધી ગયું કે દિલ્હીની વિઝિબ્લિટી ખુબ ઓછી થઈ છે. ઓછી વિઝિબ્લિટીના પગલે દિલ્હી એરપોર્ટ પર ઉડાણો પ્રભાવિત થઈ છે. મળતી માહિતી મુજબ 32 ફ્લાઈટ્સને ડાઈવર્ટ કરાઈ છે. 12 ફ્લાઈટને જયપુર, અમૃતસર અને લખનઉ ડાઈવર્ટ કરાઈ છે. 

અત્રે જણાવવાનું કે દિલ્હી અને આસપાસના વિસ્તારોમાં શુક્રવારે હવાની ગુણવત્તા ખતરનાક 'ગંભીર શ્રેણી'માં પહોંચ્યા બાદ ઈપીસીએ સાર્વજનિક સ્વાસ્થ્ય કટોકટી સ્થિતિ જાહેર કરી દીધી છે. દિલ્હી સરકારે શુક્રવારે દિલ્હીની તમામ શાળાઓને 5 નવેમ્બર સુધી બંધ રાખવાના આદેશ આપ્યા હતાં. 

આ ઉપરાંત દિલ્હી સરકારે ચાર નવેમ્બરથી 15 નવેમ્બર સુધી દિલ્હીમાં વાહનોની ઓડ ઈવન યોજના લાગુ કરવા માટે શુક્રવારે નોટિફિકેશન બહાર પાડી દીધુ હતું. 

જુઓ LIVE TV

ઝેરીલી હવાથી બચવાના નુસ્ખા
- એન્ટી પોલ્યુશન માસ્ક સારામાં સારો વિકલ્પ છે. 
- શક્ય હોય તો ઘરથી બહાર ન નીકળો, રૂમમાં એસી ચલાવો.
- ડોક્ટરની સલાહ મુજબ જ કોઈ દવા લો.
- રોજની સરખામણીમાં વધુ પાણી પીવો.
- મધ અને આદુની ચા ગળા માટે ફાયદાકારક.
- ગરમ પાણીમાં તુલસી અને ફૂદીનો ગળું સાફ કરશે. 
- કપૂર અને નારિયેળનું તેલ લગાવવાથી ત્વચાને નુકસાન નહીં થાય. 
- મધ, સૂંઠ, કાળા મરી અને પીપલનો પાઉડર પાણીમાં ભેળવી પીવોય
- સૂતા સમયે હળદર અને સૂંઠને દૂધમાં ઉકાળીને પીવો.
- તુલસી, તજની ચાથી કફમાં રાહત મળશે. 
- લીમડો, તુલસી, ચંદન, હળદરની પેસ્ટ પ્રદૂષણથી વાળને બચાવશે.