కర్త్యవం, పోలీస్ స్టోరీ, అంకుశం లాంటి సినిమాలు ఆంధ్రప్రదేశ్‌లో పోలీసులను సిసలైన హీరోలుగా చూపించిన మేటి సినిమాలు. ఇప్పుడు వాటి సరసన తమిళ డబ్బింగ్ చిత్రం "ఖాకీ" కూడా చేరనుంది. తమిళ స్టార్ హీరో సూర్య సోదరుడు కార్తి ప్రధాన పాత్ర పోషించిన ఈ చిత్రం ఇటీవలే తెలుగులో కూడా విడుదలై సంచలన విజయం నమోదు చేసింది. నిజాయతీ గల పోలీసుగా, బందిపోటు ముఠా రహస్యాన్ని చేధించే క్రమంలో అగచాట్లు పడ్డ అధికారిగా వాస్తవికమైన నటనతో ఆకట్టుకున్న కార్తి పలువురి విమర్శకుల ప్రశంసలు కూడా అందుకున్నారు.
ఈ క్రమంలో ఈ చిత్ర నిర్మాతలు ఈ సినిమాను పోలీసులకు అంకితమిచ్చారు. తెలంగాణలో పోలీసు కమీషనరును కలిసి ఈ శని, ఆదివారాల్లో 1500 మంది రాష్ట్ర పోలీసులకు ఉచిత షో వేసి ఈ చిత్రాన్ని చూపించాలని భావిస్తున్నట్లు తెలిపారు. వినోద్ దర్శకత్వం వహించిన ఈ చిత్రాన్ని ఇప్పటికే డీజీపీ జాంగిద్ ప్రశంసలతో ముంచెత్తారు.
