తమిళనాడు మాజీ మంత్రి కేపీపీ సామీ కన్నుమూత

తమిళనాడులోని డీఎంకే పార్టీలో విషాదం చోటుచేసుకుంది. పార్టీకి చెందిన కీలకనేత, రాష్ట్ర మాజీ మంత్రి కేపీపీ సామీ కన్నుమూశారు.

చెన్నై : తమిళనాడులో డీఎంకే పార్టీలో విషాదం చోటుచేసుకుంది. రాష్ట్ర మాజీ మంత్రి, డీఎంకే ఎమ్మెల్యే కేపీపీ సామీ గురువారం (ఫిబ్రవరి 27న) ఉదయం కన్నుమూశారు. గత కొంతకాలం నుంచి కిడ్నీ ఫెయిల్, ఇతరత్రా అనారోగ్య సమస్యలతో సతమతవుతున్న ఆయన చెన్నైలోని ఓ ఆస్పత్రిలో చికిత్స తీసుకున్నారు. ఈ క్రమంలో ఆరోగ్యం విషమించడంతో నివాసంలోనే కేపీపీ సామీ తుదిశ్వాస విడిచారని డీఎంకే అధికార ప్రతినిధి, రాజ్యసభ సభ్యుడు టీకేఎస్ ఎలంగోవన్ తెలిపారు.

మంత్రిగా పని చేసిన నేత కావడంతో రాష్ట్ర వ్యాప్తంగా ఆయన మృతిపట్ల పలువురు నేతలు సంతాపం ప్రకటించారు. డీఎంకే నేతలు సామీ కుటుంబ సభ్యులకు ప్రగాఢ సానుభూతి తెలిపారు. కేపీపీ సామీ ప్రస్తుతం తిరువొట్టివూర్ ఎమ్మెల్యేగా ఉన్నారు. 2006-2011 మధ్య కాలంలో డీఎంకే ప్రభుత్వంలో మత్స్య సంవర్ధకశాఖ మంత్రిగా సేవలందించారు.