દિવાળીની રજાઓમાં હાઉસફુલ રહ્યું કાંકરિયા, લાખોની કમાણીથી AMCનું ખિસ્સું ભરાયું

અર્પણ કાયદાવાલા/અમદાવાદ :દિવાળીનો તહેવાર અમદાવાદ મ્યુનિસિપલ કોર્પોરેશન (AMC) માટે આવકનું સાધન બનીને આવ્યો છે. દિવાળી (Diwali) , નવુ વર્ષ અને ભાઇબીજ, એમ 3 દિવસમાં કાંકરીયા (Kankariya) પરીસરમાં લોકોની પ્રવેશ ફી અને વિવિધ સ્થળોની મુલાકાતથી તંત્રને રૂ 25 લાખ કરતા વધુની આવક થઇ છે. જેમાં કાંકરીયા પરિસર ઉપરાંત તેમાં આવેલી કિડ્સ સિટી (Kids City) , નોકટરનલ હાઉસ, બાલ વાટિકા અને ઝૂ (zoo) માં મળીને કુલ 1.29 લાખ લોકોએ મુલાકાત લીધી છે.

દિવાળીનો તહેવાર અને ઉપરથી રજાઓ... ત્યારે દિવાળી, નવુ વર્ષ અને ભાઈબીજ એમ 3 દિવસ મળીને અમદાવાદના ફેમસ ટુરિસ્ટ પ્લેસ એવા કાંકરીયામાં 1.29 લાખ લોકોએ મુલાકાત લઇને વિવિધ રાઇડ અને અન્ય આકર્ષણોની મજા માણી છે. જેના કારણે અમદાવાદ મ્યુનિસિપલ કોર્પોરેશન તંત્રને રૂ.25 લાખથી વધુ આવક થઈ છે. નોંધનીય છે કે, ગત જુલાઇ માસમાં કાંકરીયામાં સર્જાયેલી રાઇડ દુર્ઘટના બાદ હજી પણ મોટી રાઇડ ઉપરાંત મિની ટ્રેન સહિતની મિકેનીકલ રાઇડ પોલીસ મંજૂરીના અભાવે બંધ અવસ્થામાં છે. ત્યારે આ વર્ષે મુલાકાતીઓનો ધસારો નોક્ટરનલ હાઉસમાં જોવા મળ્યો. સાથે જ કિડ્સ સિટી, પ્રાણીસંગ્રહાલય અને બાલ વાટિકા સહીતના આકર્ષણો પણ મુલાકાતીઓની પસંદ બની રહ્યા છે. એક નજર કરીએ કાંકરીયા પરીસરમાં આવેલા વિવિધ આકર્ષણોના મુલાકાતીઓ અને તેમના થકી થયેલી આવકના આંકડા પર..

દિવાળી 27 ઓક્ટોબર :

	મુલાકાતી	આવક
કાંકરીયા પ્રવેશ	5748	50810
કિડ્સ સિટી	161	12230
ઝુ	2902	52250
નોક્ટરનલ ઝુ	3900	174000
બાલવાટીકા	1088	3111
બટરફ્લાય પાર્ક	685	5600
કુલ	14484	298001

નવુ વર્ષ  28 ઓક્ટોબર :

	મુલાકાતી	આવક
કાંકરીયા પ્રવેશ	23247	199305
કિડ્સ સિટી	149	10980
ઝુ	5930	110470
નોક્ટરનલ ઝુ	12200	553000
બાલવાટીકા	2793	8024
બટરફ્લાય પાર્ક	2025	1820
કુલ	46344	899979

ભાઇબીજ 29 ઓક્ટોબર :

	મુલાકાતી	આવક
કાંકરીયા પ્રવેશ	34639	314780
કિડ્સ સિટી	473	34270
ઝુ	7094	128850
નોક્ટરનલ ઝુ	18700	827000
બાલવાટીકા	5366	15276
બટરફ્લાય પાર્ક	2190	20200
કુલ	68462	1340376

ઉલ્લેખનીય છે કે, કાંકરીયાનું સૌથી મોટું આકર્ષણ એવી અટલ એક્સપ્રેસ અને સ્વર્ણિમ જંયતી એક્સપ્રેસ નામની બે મિનીટ્રેન છે. આ ઉપરાંત અન્ય મોટી રાઈડ્સને પોલીસ સહિતના વિવિધ એજન્સીઓની મંજૂરી બાકી હોવાથી લોકો તેની મજા માણી શકતા નથી. ત્યારે હજી પણ દિવાળીનું વેકેશન બાકી હોવાથી લોકોનો ધસારો સતત વધતો રહેશે અને તંત્રની આવક વધશે. 

સમગ્ર ગુજરાતના લેટેસ્ટ સમાચાર, જુઓ LIVE TV :