ભારતીય સેના પણ કોરોના વાયરસના ભરડામાં!, લદાખમાં એક જવાનનો ટેસ્ટ પોઝિટિવ

નવી દિલ્હી: કોરોના વાયરસે સમગ્ર દેશમાં હડકંપ મચાવ્યો છે. દેશભરમાં આ વાયરસના કારણે અત્યાર સુધીમાં 3 લોકોના મોત થઈ ચૂક્યા છે. તેનાથી પીડિતોની સંખ્યા સતત વધી રહી છે. અત્યાર સુધી આ સંખ્યા 137 હતી પરંતુ હવે ભારતીય સેનાનો એક જવાન પણ કોરોના વાયરસની ચપેટમાં આવ્યો છે. 

એએનઆઈએ સૂત્રોના હવાલે જણાવ્યું છે કે એક જવાન કોરોના વાયરસ પોઝિટિવ જોવા મળ્યો છે. આ જવાનના પિતા 27 ફેબ્રુઆરીના રોજ ઈરાનથી ભારત પાછા ફર્યા હતાં. આ જવાનની ઉંમર 34 વર્ષ છે અને તે લદાખમાં પોસ્ટેડ હતો. 

જવાનના પિતાને 29 ફેબ્રુઆરીના રોજ ક્વોરેન્ટાઈનમાં મોકલવામાં આવ્યાં હતાં. અને તેઓ 6 માર્ચના રોજ કોરોના પોઝિટિવ આવ્યાં હતાં. આ જવાન 25 ફેબ્રુઆરીથી એક માર્ચ સુધી રજા પર હતો અને તેણે 2 માર્ચના રોજ ડ્યૂટી જોઈન કરી હતી. 

આ VIDEO પણ ખાસ જુઓ...

સૂત્રોનું કહેવું છે કે ક્વોરેન્ટાઈન દરમિયાન જવાને પોતાના પરિવારની મદદ કરી હતી. જ્યારે જવાનના પિતામાં વાયરસ હોવાનું જાણવા મળ્યું તો જવાનને પણ 7 માર્ચ સુધી ક્વોરેન્ટાઈનમાં રાખવામાં આવ્યો. 16 માર્ચના રોજ જવાન પોઝિટિવ હોવાનું જાણવા મળ્યું. ત્યારબાદ જવાનને એસએનએમ હોસ્પિટલમાં આઈસોલેટ કરાયો છે. જવાનની પત્ની અને બહેનને પણ ક્વોરેન્ટાઈનમાં મોકલવામાં આવ્યાં છે.