આવતા મહિને બે દિવસના પ્રવાસે ભારત આવશે પ્રિન્સ ચાર્લ્સ

નવી દિલ્હીઃ બ્રિટનના શાહી પરિવારના સભ્ય પ્રિન્સ ચાર્લ્સ આવતા મહિને બે દિવસના ભારત પ્રવાસે આવશે. પ્રિન્સ ચાર્લ્સની ઓફિસના જણાવ્યા અનુસાર પ્રિન્સ ચાર્લ્સનો આ પ્રવાસ ભારતના સ્થાનિક બજાર, જળવાયુ પરિવર્તન અને સામાજિક-આર્થિક મુદ્દે કેન્દ્રીત છે. 70 વર્ષના પ્રિન્સ ચાર્લ્સ 13 નવેમ્બરને બે દિવસના પ્રવાસ માટે નવી દિલ્હી આવશે. 

પ્રિન્સ ચાર્લ્સની આ ભારતની 10મી મુલાકાત છે. આ અગાઉ તેઓ 2017ના નવેમ્બર મહિનામાં ભારતના પ્રવાસે આવ્યા હતા. એ સમયે તેમનાં પત્ની કેમિલા પણ તેમની સાથે હતા. 2017માં પ્રિન્સ ચાર્લ્સે ભારતની સાથે-સાથે બ્રૂનેઈ, સિંગાપોર અને મલેશિયાની સંયુક્ત યાત્રા કરી હતી. 

ઉલ્લેખનીય છે કે, બ્રિટન યુરોપિય સંઘ છોડ્યા પછી ભારત સાથે એક વ્યાપાર કરાર સુનિશ્ચિત કરવા માટે ઉત્સુક છે. તાજેતરમાં જ પ્રિન્સ ચાર્લ્સના પુત્ર વિલિયમ અને તેમનાં પત્ની કેટે પાકિસ્તાનની 4 દિવસની યાત્રા કરી હતી. આ યાત્રાના એક સપ્તાહ પછી પ્રિન્સ ચાર્લ્સની ભારત યાત્રાની જાહેરાત કરાઈ છે. 

જુઓ LIVE TV.....