કોઈ વિચારી પણ નહિ શકે, કે ગુજરાતના આ સ્થળે થોડા દિવસો પહેલા રણ હતું, અને હવે જુઓ....

ઝી મીડિયા/બ્યૂરો :ગુજરાતના સરહદી જિલ્લા બનાસકાંઠાના સરહદી સુઈગામ તાલુકામાં આવેલું નડાબેટનું રણ અત્યારે સમુદ્રમાં ફેરવાઈ ગયું છે. એક માત્ર એવું રણ જે નડાબેટથી ઓળખાય છે. પણ તે તેના નામ પ્રમાણે ક્યારેય બેટમાં ફેરવાતું નથી. પણ હવે નડાબેટ પણ બેટમાં ફેરવાઈ ગયું છે. ઉપરવાસમાં ભારે વરસાદથી નડાબેટના રણમાં પાણીની આવક થતાં હવે માત્ર નડેશ્વરી માતાજીના મંદિર સુધી જવાનો રસ્તો જ પાણી વગરનો છે. બાકી આખા રણમાં માત્ર પાણી જ પાણી નજરે પડી રહ્યું છે. બારે માસ સૂકું ભઠ રહેતું નડાબેટનું રણ હવે દરિયા જેવું દેખાઈ રહ્યું છે. જ્યાં જુઓ ત્યાં પાણી જ પાણી... ઉનાળાની ગરમીમાં કે શિયાળાની ઠઁડીમાં આ રણમાં ઝાંઝવાનાં જળ દેખાતાં હતાં તે હવે હકીકતમાં વરસાદી પાણીથી સમુદ્રના જળમાં તબદિલ થઈ ગયાં છે. રણમાં પાણી ભરાતાં દરિયા જેવાં દ્રશ્યો સર્જાયાં છે અને પાકિસ્તાન બોર્ડરને અડીને આવેલા નડાબેટમાં નડેશ્વરી માતાજીનાં દર્શન કરવા જતા લોકો રણમાં ભરાયેલા આ પાણીને જોઈને અભિભુત થઈ રહ્યા છે.