தமிழக மக்கள் குடிநீருக்கு அலைய காரணமான உள்ளாட்சித்துறை அமைச்சர் எஸ்.பி. வேலுமணி உடனடியாக தனது பதவியை ராஜினாமா செய்ய வேண்டும் என திமுக தலைவர் மு.க. ஸ்டாலின் கூறியுள்ளார்.
அதுகுறித்து அவர் வெளியிட்டுள்ள அறிக்கையில் கூறியதாவது:
“சென்னையில் நிலவும் குடிநீர் பஞ்சத்தைப் போக்க நீங்கள் என்ன நடவடிக்கை எடுத்தீர்கள்” என்று சென்னை உயர்நீதிமன்றத்தின் இரு நீதிபதிகள் அடங்கிய அமர்வு கேள்வி எழுப்பியும், உள்ளாட்சித்துறை அமைச்சர் திரு வேலுமணியும், முதலமைச்சர் எடப்பாடி திரு பழனிச்சாமியும் திருந்தியபாடில்லை. நாள்தோறும் குடிநீர் தேடி அலைந்து அல்லல்பட்டுத் திண்டாடும் மக்கள் பற்றித் துளியும் கவலைப்படாமல்- கட்சிக் கூட்டங்களையும் நடத்திக் கொண்டும், பத்திரிக்கை மற்றும் ஊடகங்களுக்கு எச்சரிக்கை விடுத்துக் கொண்டும்- மக்கள் எக்கேடு கெட்டால் நமக்கு என்ன என்று அலட்சியமாகவும் ஆணவத்துடனும் இருக்கும் அதிமுக ஆட்சியாளர்களுக்குக் கடும் கண்டனத்தைத் தெரிவித்துக் கொள்கிறேன்.
சென்னைக்கு எவ்வளவு குடிநீர் தேவை என்பதைக் கூடத் தெளிவாகத் தெரிந்து கொள்ளாமல் “தினமும் 7000 மில்லியன் லிட்டர் தண்ணீர் சப்ளை செய்து கொண்டு வருகிறோம்” என்று இந்தத் துறைக்கு அமைச்சராக இருப்பவரே பத்திரிக்கையாளர் சந்திப்பில் உளறிக் கொட்டி,பத்திரிக்கையாளர் நகைப்புக்குப் பாத்திரமாகிக் கொண்டிருப்பதைப் பார்த்தால் வேதனையாக இருக்கிறது.
நெம்மேலி மற்றும் மீஞ்சூர் கடல் நீரைக்குடிநீராக்கும் திட்டங்களில் 200 மில்லியன் (தலா 100 மில்லியன் லிட்டர்) லிட்டர் குடிதண்ணீர் கிடைத்திருக்க வேண்டும். ஆனால் நெம்மேலி கடல்நீரைக் குடிநீராக்கும் திட்டத்தில் 100 மில்லியன் லிட்டர் தண்ணீர் கிடைக்கவில்லை என்பது சென்னை பெருநகர குடிநீர் வாரிய அதிகாரிகளுக்கே நன்கு தெரியும். பத்திரிக்கைகளிலேயே இந்த இரு கடல் நீரைக்குடிநீராக்கும் திட்டங்கள் மூலம் 150 மில்லியன் லிட்டர் தண்ணீர் மட்டுமே கிடைக்கிறது என்று செய்திகள் வெளிவந்துள்ளன.
நெம்மேலி கடல் நீர் குடிநீராக்கும் நிலையம் இருக்கும் இடத்திலிருந்து எவ்வளவு தூரத்தில் தண்ணீர் சுத்திகரிக்கப்படுகிறது? அதற்காக ஒதுக்கப்பட்ட தொகை எப்படி செலவிடப்பட்டது? 100 மில்லியன் லிட்டரை 115 மில்லியன் லிட்டராக உயர்த்த நெம்மேலி கடல்நீரைக்குடிநீராக்கும் திட்டத்தில் செலவிடப்பட்டது எவ்வளவு? அதன்படி இன்னும் ஏன் நெம்மேலியிலிருந்து 115 மில்லியன் லிட்டர் தண்ணீரை எடுக்க முடியவில்லை? இந்தக் கேள்விகளை எல்லாம் கேட்டு மெட்ரோ வாட்டரில் உள்ள ஒவ்வொரு பொறியாளரும் வாய் விட்டுச் சிரிப்பது
“கமிஷன் ஒன்றே கண்கண்ட தெய்வம்” என்று கண்களை மூடித் தவமிருக்கும் உள்ளாட்சித்துறை அமைச்சர் திரு எஸ்.பி. வேலுமணிக்குத் தெரியாமல் இருப்பது- அவரது பணி அமைச்சர் பணியல்ல. “கமிஷன், கரப்ஷன், கலெக்ஷன்” மட்டுமே என்பது ஊருக்கும் உலகத்திற்கும் தெளிவாகிறது!
சென்னை மெட்ரோ வாட்டர் மூலம் ஒரு நாளைக்கு சென்னை மக்களுக்கு 825 மில்லியன் லிட்டர் குடிநீர் விநியோகம் செய்ய வேண்டிய சூழலில் கடந்த ஜூன் 4 ஆம் தேதி பத்திரிக்கையாளர்களைச் சந்தித்த அமைச்சர் திரு வேலுமணி “ஜூன் பதினைந்தாம் தேதி வரைதான் 500 மில்லியன் லிட்டர் குடிநீர் சப்ளை செய்ய முடியும்” என்று கூறி விட்டு, பிறகு “நவம்பர் வரைகூட ஓரளவு சப்ளை செய்து விட முடியும்” என்று கூறினார்.
அப்படியிருக்கும் போது குடியிருப்பு வாசிகள் “ஆன்லைனில் புக்கிங்” செய்யும் டேங்கர் லாரி குடிநீருக்காக 15 முதல் 18 நாட்கள் காத்திருக்க வேண்டிய நிலை ஏன் வந்துள்ளது? தெருத்தெருவாக மக்கள் குடங்களை தூக்கிக் கொண்டு சைக்கிளிலும், ரிக்ஷாக்களிலும் தொலை தூரம் சென்று ஒரு குடம் தண்ணீர் சேகரிக்கத் தள்ளப்பட்டுள்ளது ஏன்? மெட்ரோ வாட்டர் குழாய்களில் வரும் குடிநீரும் பல இடங்களில் துர் நாற்றம் வீசுவது ஏன்? தண்ணீர் இல்லாமல் பல உணவகங்கள் மூடப்படுவது ஏன்? தண்ணீர் பஞ்சத்தை சமாளிக்க முடியாமல் ஐ டி கம்பெனிகள் தங்களது ஊழியர்களை இல்லத்தில் இருந்தே பணியாற்ற உத்தரவிட்டுள்ள அவல நிலைமை சென்னைக்கு வந்தது ஏன்? இதற்கெல்லாம் “ஊழலில்” நீந்தும் உள்ளாட்சித்துறை அமைச்சரிடம் உரிய பதில் இல்லை.
தொடர்ந்து மழைப் பற்றாக்குறை இருப்பது தெரிந்தும், “நெம்மேலியில் இன்னொரு 150 மில்லியன் கடல் நீரை குடிநீராக்கும் திட்டமும்” “சென்னை அருகில் உள்ள பேரூரில் 400 மில்லியன் லிட்டர் கடல் நீரைக் குடிநீராக்கும் திட்டமும்” நிறைவேற்றப்படாமல் இருப்பது ஏன்? “நான்கு வருடங்களில் நிறைவேற்றப்படும்” என்ற 2013ல் அறிவிக்கப்பட்ட அந்த இரு திட்டங்களும் 2019 ஆம் ஆண்டிலும் அப்படியே கிடப்பது ஏன்? இப்போது அவசர அவசரமாக 150 மில்லியன் லிட்டர் நெம்மேலி கடல் நீர் திட்டத்தை நிறைவேற்ற விடப்பட்டுள்ள டெண்டரில் மிகப் பெரிய ஊழல் நடைபெற்றுள்ளது. சென்னைக்குக் கிடைக்க வேண்டிய கிருஷ்ணா நீரைப் பெறுவதற்குக் கூட ஆந்திர மாநில முதல்வரைச் சந்திக்க உள்ளாட்சித்துறை அமைச்சர் முயற்சிக்கவில்லை.
அதற்கு மாறாக டெல்லிக்குச் சென்று பா.ஜ.க. மத்திய அமைச்சர்களைச் சந்தித்து “எங்கள் கட்சிப் பிரச்சினையைத் தீர்த்து வையுங்கள்” “எங்கள் மீது எந்த ஊழல் நடவடிக்கையும் எடுத்து விடாதீர்கள்” என்று மண்டியிட்டு மடிப்பிச்சை கேட்டுக் கெஞ்சுவதை மட்டுமே உள்ளாட்சித்துறை அமைச்சர் இந்த மூன்று வருடங்களில் செய்து கொண்டிருக்கிறார். புதிய மெகா கூட்டுக் குடிநீர்த் திட்டங்களை நிறைவேற்றவோ, கடல் நீரைக்குடிநீராக்கும் திட்டங்களை விரைந்து முடிக்கவோ எந்த நடவடிக்கையும் எடுக்கவில்லை. சென்னைப் பெருநகர் குடிநீர் வாரியத்திலும், தமிழ்நாடு குடிநீர் வடிகால் வாரியத்திலும் “டெண்டர்களில்” கமிஷன் வசூல் செய்வதில் காட்டும் அக்கறையில் ஒரு துளியை உள்ளாட்சித் துறை அமைச்சர், கடல் நீரைக் குடிநீராக்கும் திட்டத்தில் காட்டியிருந்தால்- சென்னைக்கான அந்த இரு திட்டங்களை நான்குவருடத்தில் நிறைவேற்றியிருந்தால், இன்று சென்னை மக்கள் குடிநீர்ப் பஞ்சத்தில் துடிக்க வேண்டிய நிலை- துயரப்பட வேண்டிய நிலை வந்திருக்காது.
இந்நிலையில் நான் ஏற்கனவே விடுத்த வேண்டுகோளை ஏற்று கழக சட்ட மன்ற உறுப்பினர்கள் ஆங்காங்கே குடி நீர் விநியோகம் செய்வதாக வரும் செய்திகள் ஆறுதலாக இருந்தாலும் பொது மக்களுக்கு குடிநீர் வழங்கும் பணியை தங்களால் இயன்றவரை மேலும் முனைப்புடன் நிறைவேற்றிட வேண்டும் என்று கழக சட்ட மன்ற உறுப்பினர் களை கேட்டு கொள்கிறேன்.
ஆகவே சென்னை மக்களின் குடிநீர்ப் பிரச்சினையைத் தீர்க்க உடனடியாக ஆக்கபூர்வமான நடவடிக்கைகளில் முதலமைச்சர் எடப்பாடி திரு பழனிச்சாமி ஈடுபட வேண்டும் என்று கேட்டுக் கொள்கிறேன். உள்ளாட்சித்துறை அமைச்சரின் படு தோல்விதான், இன்று சென்னை மக்கள் மட்டுமின்றி - தமிழ்நாடு மக்களும் குடிநீருக்கு அலையும் கொடுமைக்கு முழுக்காரணம்.
ஆகவே இந்தத் தோல்விக்கு தார்மீகப் பொறுப்பேற்று உள்ளாட்சித்துறை அமைச்சர் திரு எஸ்.பி. வேலுமணி தனது அமைச்சர் பதவியை உடனடியாக ராஜினாமா செய்ய வேண்டும். அப்படி அவர் ராஜினாமா செய்யத் தவறினால், முதலமைச்சர் உடனடியாக, இன்றைய குடிநீர்ப் பஞ்சத்திற்கும் கோடானுகோடி மக்களின் துன்பத்திற்கும் வித்திட்ட அவரை, அமைச்சர் பதவியிலிருந்து தயவு தாட்சண்யம் பார்க்காமல் “டிஸ்மிஸ்” செய்ய வேண்டும் என்று வலியுறுத்திக் கேட்டுக் கொள்கிறேன். தமிழக மக்களும் அதைத்தான் எதிர்பார்க்கிறார்கள்.
இவ்வாறு அவர் கூறியுள்ளார்.
