నేడు హైదరాబాద్‌లో ఆతిథ్య జట్టు సన్‌రైజర్స్ హైదరాబాద్‌తో తలపడేందుకు నగరానికి వచ్చిన రాయల్ చాలెంజర్స్‌ బెంగళూరు జట్టు ఆటగాళ్లు.. హైదరాబాద్‌కే చెందిన తమ జట్టు బౌలర్ మహమ్మద్ సిరాజ్ ఇంట్లో ఆదివారం రాత్రి పండగ చేసుకున్నారు. ఆదివారం నాడు సాయంత్రం వరకు ఉప్పల్ స్టేడియంలో క్రికెట్ ప్రాక్టీస్ చేసిన జట్టు కెప్టేన్ విరాట్ కోహ్లీ, పార్థివ్ పటేల్ సహా పలువురు ఆటగాళ్లు అనంతరం అక్కడి నుంచి నేరుగా టోలిచౌకిలోని సిరాజ్ ఇంటికి వెళ్లారు. హైదరాబాద్ వాసి అయిన మహమ్మద్ సిరాజ్ తన ఇంటికి వచ్చిన తోటి ఆటగాళ్ల కోసం ప్రత్యేకంగా హైదరాబాద్ బిర్యానీని వండించి వడ్డించాడు. హైదరాబాద్ బిర్యానీతోపాటు హైదరాబాద్ స్పెషల్‌ వంటకాలను కూడా కోహ్లీ సేనకు రుచి చూపించాడు. సిరాజ్ ఇచ్చిన విందును రాయల్ ఛాలెంజర్స్ బెంగుళూరు జట్టు ఆటగాళ్లు కిందే కూర్చోని ఎంజాయ్ చేశారు.
విందు అనంతరం సిరాజ్ కుటుంబసభ్యులతో కాసేపు సరదాగా మాటామంతీ కలిపిన ఆర్సీబీ బృందం.. రెండు గంటలపాటు అక్కడే సందడి చేసింది. అనంతరం సిరాజ్ ఇంటి నుంచి హోటల్‌ రూమ్‌లకి వెళ్లిపోయారు. విరాట్ కోహ్లీ అండ్ గ్యాంగ్‌కి సిరాజ్ ఇచ్చిన ఈ విందు ఫోటోలు, వీడియోలు ప్రస్తుతం సోషల్ మీడియాలో చల్‌చల్ చేస్తున్నాయి.
