કોરોના વેક્સિનને મંજૂરીઃ એમ્સના ડાયરેક્ટર બોલ્યા- દેશ માટે મહત્વનો દિવસ, નવા વર્ષની સારી શરૂઆત

નવી દિલ્હીઃ ડ્રગ કંટ્રોલર જનરલ ઓફ ઈન્ડિયા (DCGI)એ બે વેક્સિન સીરમ ઈન્સ્ટિટ્યૂટની કોવિશીલ્ડ અને ભારત બાયોટેકની કોવેક્સીનને ભારતમાં ઇમરજન્સી ઉપયોગની મંજૂરી આપી દીધી છે. તેના પર એમ્સના ડાયરેક્ટર રણદીપ ગુલેરિયાએ ખુશી વ્યક્ત કરતા કહ્યુ કે, આ ભારત માટે મહત્વનો દિવસ છે. તેમણે વેક્સિનની સુરક્ષા પર સવાલ ઉઠાવનારના જવાબમાં કહ્યુ કે, આપણે તેની ચિંતા ન કરવી જોઈએ કારણ કે વેક્સિન ઘણા તબક્કામાંથી પસાર થાય છે. 

ગુલેરિયાએ કહ્યુ, 'આ આપણા દેશ માટે મહત્વનો દિવસ છે સાથે નવા વર્ષની સારી શરૂઆત પણ છે. બંન્ને વેક્સિન ભારતમાં બની છે. તે સસ્તી પણ છે અને તેને લગાવવી સરળ છે. આપણે જલદી આ બંન્ને વેક્સિનને લોન્ચ કરી દેવી જોઈએ.'

'સુરક્ષા પર સમજુતિ નહીં'
વેક્સિન કેટલી સુરક્ષિત છે, આ પ્રકારના સવાલો પર ગુલેરિયાએ કહ્યુ, 'તે સમજવુ જરૂરી છે કે જ્યારે અમે કોઈ વેક્સિન પર વિચાર કરીએ તો સુરક્ષા સર્વોપરિ છે. તેથી વેક્સિન વિભિન્ન તબક્કામાંથી પસાર થાય છે જેથી નક્કી કરી શકાય કે તે સુરક્ષિત છે. ત્યારબાદ હ્યૂમન ટ્રાયલ તરફ આવીએ છીએ. નિષ્ણાંત તમામ આંકડાની તપાસ કરે છે ત્યારબાદ વેક્સિનને મંજૂરી આપવામાં આવે છે.'

આ પણ વાંચોઃ 2 કોરોના રસીને મળી મંજૂરી, બંનેમાંથી કઈ વધુ અસરકારક, કિંમત સહિત ખાસ વાતો જાણો

'ભારત બાયોટેકની વેક્સિન છે બેકઅપ'
બંન્ને વેક્સિનનો કઈ રીતે ઉપયોગ થશે તેના પર ગુલેરિયાએ કહ્યુ, 'ઇમરજન્સી સ્થિતિમાં જો અચાનક કેસ વધે છે અને રસીકરણની જરૂર પડે છે તો ભારત બાયોટેકની વેક્સિનનો ઉપયોગ કરવામાં આવશે. આ સિવાય જો આપણને સીરમ ઈન્સ્ટિટ્યૂટની વેક્સિનની ક્ષમતા પર જરા શંકા થઈ તો તેના બેકઅપ તરીકે પ્રયોગ કરવામાં આવશે.'

આ પણ વાંચોઃ વેક્સિન પર રાજનીતિઃ હવે કોંગ્રેસ નેતા રાશિદ અલ્વીએ કહ્યુ- Vaccineનો વિપક્ષ વિરુદ્ધ થઈ શકે છે ઉપયોગ

હજુ યથાવત રહેશે આગળની ટ્રાયલ
આગળની રણનીતિ પર ચર્ચા કરતા ગુલેરિયાએ કહ્યુ, 'મંજૂરી આપતા સમયે વાયરસના વિવિધ સ્ટ્રેનને ધ્યાનમાં રાખતા ઇમરજન્સી સ્થિતિનો ઉલ્લેખ કરવામાં આવ્યો છે. સાથે તેની ટ્રાયલ યથાવત રહેશે, જેથી આંકડા મળતા રહેશે. એકવાર આ આંકડા આવી ગયા તો અમે વેક્સિન કેટલી સુરક્ષિત છે અને અસરકારક છે તેના પર વધુ વિશ્વાસથી વાત કરી શકીશું.'