લોકડાઉનમાં લોકો પાસે રૂપિયા નથી ને, હવે સિંગતેલના ભાવમાં વધારો થયો

રક્ષિત પંડ્યા/રાજકોટ :લોકડાઉનમાં લોકોની આર્થિક સ્થિતિ બગડી રહી છે, તો બીજી તરફ સિંગતેલના ભાવમાં ફરી એક વખત વધારો જોવા મળ્યો છે. છેલ્લા એક સપ્તાહમાં સિંગતેલ (ground nut oil) ના ભાવે ડબ્બે 60 રૂપિયાનો વધારો જોવા મળી રહ્યો છે. ડબ્બે 60 રૂપિયા વધારો થતાં આજે સિંગતેલનો ભાવ 2300ને પાર જોવા મળ્યો છે. હાલ જ્યારે લોકડાઉનમાં લોકોની આવકમાં બ્રેક લાગ્યો છે, પરંતુ જીવનજરૂરિયાતની વસ્તુઓના ભાવોમાં વધારો થઈ રહ્યો છે, જેમાં સિંગતેલ પણ બાકાત રહ્યું નથી. 

રાજકોટમાં સિંગતેલના વેપારી ભાવેશ પોપટએ જણાવ્યું હતું કે , મોટા ભાગના યાર્ડ બંધ સ્થિતિમાં હોવાથી મગફળીની અછત જોવા મળી રહી છે અને નાફેડ પાસેથી મળતી મગફળી ઊંચા ભાવની હોવાથી સિંગતેલના ભાવમાં વધારો જોવા મળી રહ્યો છે. હાલમાં બજારમાં જૂની અને નવી બે પ્રકારનું મગફળીનું તેલ આવી રહ્યું છે. જેમાં 2250 થી 2360 રૂપિયા સુધી સીંગતેલ બજારમાં ઉપલબ્ધ છે.

ઉલ્લેખનીય છે કે, અમદાવાદમાં બજારો બંધ કર્યા બાદ રાજકોટમાં પેનિક સ્થિતિ જોવા મળી રહી છે. આ કારણે લોકો સ્ટોક કરવા માટે તેલની વધુ ખરીદી કરી રહ્યાં છે. જેના કારણે સિંગતેલની માંગ વધતા ભાવમાં વધારો થયો છે. જો નાફેડ દ્વારા નીચા ભાવે મગફળી આપવામાં આવે તો સિંગતેલના ભાવમાં ઘટાડો થઇ શકે તેમ છે.